Железото е неопходно за учење, калциумот и витаминот Д за развој на коските, витаминот Б12 за силна крв, додека витаминот Ц помага во зајакнувањето на имунолошкиот систем. Четвртина чаша зеленчук (варен или суров) и иста количина овошје пет пати на ден е општа препорака за тригодишни деца. Се разбира, како што растат, оваа количина, како и вкупниот дневен внес на калории, треба да се зголемуваат, но златното правило за урамнотежена исхрана – пет порции овошје и зеленчук дневно – сè уште важи. Но, кој зеленчук и овошје се сепак малку подобри од останатите, односно на кои намирници треба да им дадете предност?
Спанаќ (и воопшто зелен лиснат зеленчук)
Спанаќот е одличен извор на железо, фолна киселина и витамин А, а добар е и за здравјето на мозокот. Содржи и калциум, магнезиум, калиум, влакна и цела низа други хранливи материи кои добро делуваат на организмот. Американската академија за педијатрија (ААП) предлага спанаќот да се вари на пареа или пире како здрав прилог.
Сладок компир
Слаткиот компир е исклучително богат со витамин А, како и со растителни влакна, поради што има најголемо благотворно дејство на дигестивниот систем. Во оваа ситуација, кога децата помалку се движат и повеќе остануваат дома (и затоа грицкаат повеќе слатки и други помалку вредни намирници), слаткиот компир ќе помогне во функционирањето на дигестивниот систем. Бидејќи е богат со манган, кој е важен за метаболизмот на јаглехидратите, ќе биде корисен дури и ако поради домашна изолација и „вишокот“ време почесто правите и јадете колачи. Со слаткиот компир ќе постигнете одличен баланс.
Брокула
Брокулата содржи голема количина на витамин Ц, калиум и железо, кои се важни за силен имунитет. Динствувајте ја додека целосно не омекне, за да му биде полесно на детето да ја изеде, или од неа подгответе густа супа – така е најприфатливо за многу деца. Брокулата е богата со влакна, кои помагаат во варењето и спречуваат запек.
Бобинки
Ова овошје е богат извор на витамини, минерали и диетални влакна. Главните позитивни ефекти врз здравјето на луѓето се поврзани со исклучителните антиоксидантни и антиинфламаторни својства. Одлично е и за задоволување на слатките апетити на детето, а добрата вест е што повеќето деца го сакаат овој тип на овошје.
