Малите бебиња не можат да кажат дали плачат зошто ги мачат грчеви во стомачето, имаат мака со забите или станува збор за нешто посериозно. Затоа е многу важно да се знаат кои се симптомите при избивање на првите заби.
Засилено лачење плунка
Засиленото лачење плунка родителите веднаш го поврзуваат со растот на бебешките заби. Но, бебињата рано почнуваат да се лигават и поради отворање на плунковната жлезда која почнува во третиот месец. Тогаш на бебињата не им избиваат првите заби. Тие се јавуваат од четвртиот до шестиот месец, а онаа плунка која ги следи, всушност е природен начин за олеснување на болката. Таа помага при ублажување на состојбата на воспалени непца и засилено се создава при избивање на секој нов заб.
Исип од плунка
Нагласеното лигавње и исипот одат рака под рака. Некои бебиња толку многу продуцираат плунка, што исипот може да им се прошири и по вратот. Бебешката кожа треба често да се тапка со чиста платнена крпа (не да се брише, оти тоа ја оштетува кожата), и надразнетото подрачје да се мачка со помасна крема за да се создаде заштитен слој.
Бебето е нервозно и често плаче
Бебето комуницира со плачење и со смеење. Па, кога му избиваат забите, тоа сака да ви го каже со плачење.
Намален апетит
Кога запчињата избиваат, непцата се воспалени, а бебето има ново чувство во устата. Непцата се отечени, па храната или контактот со лажичка може да биде навистина болен. Додека забот не избие, нормално е бебето да не сака многу да јаде.
Чешање на непцата
Непцата низ кои избиваат забите, го чешаат бебето. Тоа е причина зошто бебето ги пика своите прстиња во уста кога и да може, но и сите останати предмети до кои ќе стигне, во надеж дека ќе му помогнат.
Благо зголемена температура
Никнувањето на заби, често е проследено со блага зголемена телесна температура. Родителите често се склони таа температура да ја препипуваат на никнување заби, но тоа може да биде и голема грешка. Имено, температурата што се јавува при избивањето заби, никогаш не е повисока од 38 степени. Се повисока од таа, е знак за некоја друга здравствена состојба кај бебето и потребно е да се консултирате со вашиот педијатар.
