Студија направена на 1.000 млади парови со цел да утврдат кој систем на воспитување го применуваат современите родители, покажала дека поголемиот дел од родителите во воспитувањето на децата се служат со материјални стимуланси. Тие за да ја искажат грижата и љубовта кон детето, најчесто му купуваат некој подарок, а ако сакаат да го казнат му забрануваат да користи некои работи. Од друга страна, доколку сакаат да го научат на некои правила и должности, скоро секогаш користат пари или ветување дека ќе добијат одреден уред. Ако детето го наместило својот кревет – ќе добие сладолед. Ако има добри оцени – ќе добие мобилен телефон на полугодие. Ако помага со средување и чистење на домот – ќе добие нови фармерки. На прв поглед делува дека се е во ред. Од една страна детето учи дека парите и подароците во неговиот живот не доаѓаат туку така, а од друга страна пак, детето има постојана стимулација да стане уште подобро.
Но, истражувањето покажало дека материјалните подароци не ги усреќуваат децата и дека децата кои од детството имаат таков третман учат самите себе и другите да ги оценуваат врз основа на материјалното со кое располагаат. Ако го плаќате детето за неговото примерно однесување, тоа на потсвесно ниво сосема несвесно, ќе започне да се однесува лошо кон оние деца што немаат играчки какви што има тоа. Тоа објаснува многу, зар не? Дали некогаш сте се запрашале зошто учениците од пониските одделенија ги исмејуваат децата кои немаат, на пример, мобилен телефон? Или зошто учениците ги малтретираат послабите од себе одземајќи им ги парите или играчките?
Постои само еден начин да му помогнете да вашето дете да се изгради во среќна и исполнета личност, а тоа е да поминувате повеќе квалитетно време со него. И наместо материјални подароци, почесто подарувајте му нови искуства и впечатоци. Следниот пат кога вашето дете ќе донесе петка по математика или без опомена наутро ќе го намести својот кревет, немојте да му купувате играчка. Одведете го во парк. Или изгледајте го заедно неговиот омилен филм.
