Како што предупредуваат педијатрите, бебињата и малите деца се почувствителни на изложување на силно сонце, поради што е неопходно да се преземат одредени мерки за да се заштитат од сонце и да се избегне сончаница. Со оглед на тоа дека детската кожа е многу почувствителна и понежна, затоа е и поподложна на сончаница, состојба која се јавува како резултат на прекумерна изложеност на сонце и високи температури на воздухот.
Иако не е секогаш најлесно да се препознае, некои симптоми кои укажуваат на сончаница кај децата, сепак, постојат, според NHS. Имено, знаците кои можат да откријат дека детето добило сончаница и дека му е потребна лекарска помош го вклучуваат следново:
- замор,
- слабост,
- главоболка,
- гадење,
- покачена температура,
- сува и црвена кожа,
- вртоглавица,
- чувство на немир.
Кај некои деца може да се забележи и ненадејна промена на расположението, што ретко родителите го поврзуваат со сончаница. Доколку детето е малаксано или одбива да пие, потребно е да се јавите на педијатар кој ќе ви даде дополнителни упатства. Во повеќето случаи симптомите се поблаги и во тој случај треба што побрзо да го тргнеме детето од сонце.
Педијатрите препорачуваат и туширање на детето со млака вода и давање течности, но постепено и во мали количини. Во случај кога е присутна и висока температура, на родителите им се препорачува да му дадат на детето некои од лековите за намалување на температурата, односно парацетамол или ибупрофен.
