Две дози вакцина Фајзер нудат заштита против ретко, но сериозно воспаление на органите кое може да се појави кај децата недели по инфекција со коронавирусот, објави американскиот Центар за контрола и превенција на болести (ЦДЦ).
Проценките што ги објави Центарот укажуваат на тоа дека вакцината е 91 процент ефикасна во спречување на мултисистемскиот инфламаторен синдром кај децата на возраст од 12 до 18 години, се наведува во студијата.
Се работи за синдром кој кај децата предизвикува воспаление на срцето, белите дробови, бубрезите и мозок, две до шест недели по блага или асимптоматска инфекција со коронавирус.
Децата на возраст од пет до 11 години се во најголем ризик од мултисистемски воспалителен синдром, но нивната имунизација во САД е одобрена дури кон крајот на октомври и тие не биле вклучени во анализата.
Процената што ја објави ЦДЦ е направена врз основа на набљудување на 238 пациенти кои престојувале во десетина болници во 20 американски држави помеѓу јули и декември, кога доминираше делта варијантата.
Најтешките 38 случаи на воспалителен синдром кои биле на апарати за одржување во живот, не биле вакцинирани.
Резултатите од студијата придонесуваат кон потврдите дека со вакцинација против коронавирус ќе се спречат компликации поврзани со оваа болест кај децата, вклучително и мултисистемскиот воспалителен синдром. Пред оваа студија, не беше познато дали Фајзер вакцината го спречува овој синдром.
Меѓутоа во студијата не е разгледана ефикасноста на вакцината против сојот омикрон кој брзо се шири во САД, се вели во извештајот на ЦДЦ. Во временскиот период во кој е спроведено истражувањето, овој сој не беше распространет.
