СВЕТСКАТА НЕДЕЛА НА ДОЕЊЕ се одбележува од 1 до 7 август, оваа година со пораката – заштитата на доењето е заедничка одговорност. Поради исклучителната важност на доењето како за здравјето на децата, така и на мајките, целта на Светската здравствена организација е до 2025 година, барем секое второ дете во првите шест месеци од животот да се храни исклучиво со мајчино млеко, односно да биде на ексклузивно доење.
Истражувањата покажуваат дека Велика Британија е земја со убедливо најниски стапки на доење. Таму, само 0,5 проценти од мајките продолжуваат да го дојат своето бебе по првата година. Спротивно на тоа, ситуацијата е сосема поинаква во Сенегал. Имено, таму дури неверојатни 99 проценти од мајките ги дојат своите деца и по првиот роденден, 56 проценти го прават тоа во Бразил, 27 проценти во САД и 23 проценти во Германија.
Мајчиното млеко е чудесен пијалок, некои го нарекуваат уште и течно злато. Содржи антитела кои му помагаат на бебето во борбата против вирусите и бактериите. Мајчиното млеко е многу хранливо, содржи вода, протеини, шеќери, масти, витамини и минерали. Вистински коктел од здрави состојки за вашето бебе.
- Првите неколку дена по раѓањето, градите произведуваат идеално „прво млеко“ или колострум. Колострумот е густа, жолтеникава течност, која ја има во мали количини, но сосема доволно за да ги задоволи нутритивните потреби на бебето. Колострумот му помага на новороденчето да се развие и да го подготви дигестивниот тракт
Експертите препорачуваат ексклузивно доење до 6 месеци од животот, без додавање вода, чај, сок.
Освен за бебето, доењето има многу придобивки и за мајките:
- Доењето согорува калории, така што може да ви помогне побрзо да го изгубите вишокот на килограми добиен во бременоста;
- Додека доите се ослободува хормонот окситоцин, кој помага матката да се врати во својата состојба пред бременоста;
- Го намалува крвавењето по породувањето;
- Докажано е дека жените кои ги дојат своите деца имаат помали шанси да добијат рак на дојка, јајници и матка;
- Може да го намали ризикот од остеопороза;
- Многу е практично, за хранење на вашето бебе сте потребни само вие (не мора да се занимавате со шишиња, стерилизатори, вештачко млеко…);
- Заштедува пари;
- Овозможува редовно време за опуштање и галење со вашето бебе;
- Доењето на вашето бебе е одлична можност да ја продлабочите врската создадена за време на бременоста.
Заедничка изјава на извршната директорка на УНИЦЕФ Хенриета Фор и генералниот директор на СЗО д-р Тедрос Аданом Гебрејесус по повод Светската недела на доењето
♦♦♦♦♦♦♦
Почетокот на доењето во првиот час од раѓањето, проследено со ексклузивно доење шест месеци и продолжување на доењето до две години или повеќе, нуди моќна линија на одбрана против сите форми на детска неисхранетост. Доењето, исто така, дејствува како прва вакцина за бебињата, заштитувајќи ги од многу вообичаени детски болести
♦♦♦♦♦♦♦
На почетокот на оваа година, владите, донаторите, граѓанското општество и приватниот сектор се обединија за да започнат Година на акција за исхрана за раст (Nutrition for Growth Year of Action). Историска можност да се трансформира начинот на кој светот се справува со глобалната определба за елиминирање на детската малнутриција.
Доењето е централно за реализација на оваа обврска.
Почетокот на доењето во првиот час од раѓањето, проследено со ексклузивно доење шест месеци и продолжување на доењето до две години или повеќе, нуди моќна линија на одбрана против сите форми на детска неисхранетост. Доењето, исто така, дејствува како прва вакцина за бебињата, заштитувајќи ги од многу вообичаени детски болести.
- Иако има напредок во стапката на доење во последните четири децении – со 50 проценти зголемување на преваленцата на ексклузивно доење на глобално ниво – Ковид-19 пандемијата ја нагласува кревкоста на тие придобивки
Во многу земји, пандемијата предизвика значителни нарушувања во услугите за поддршка на доењето, истовремено зголемувајќи го ризикот од несигурност во исхраната и неисхранетост. Неколку земји објавија дека производителите на храна за бебиња ги зголемија овие ризици со неосновани стравови дека доењето може да пренесе Ковид-19 за да ги пласираат нивните производи како побезбедна алтернатива на доењето.
Овогодинешната Светска недела на доење, под темата „Заштити го доењето: Заедничка одговорност“ е време да се преиспитаат обврските преземени на почетокот на оваа година, давајќи приоритет на средини погодни за доење за мајки и бебиња. Ова вклучува:
- Обезбедувањето дека Меѓународниот кодекс за маркетинг на замени за мајчино млеко – воспоставен за да ги заштити мајките од агресивни маркетинг практики од индустријата за храна за бебиња – е целосно имплементиран од владите, здравствените работници и индустријата.
- Обезбедување здравствени работници да имаат ресурси и информации што им се потребни за ефикасно да ги поддржат мајките да дојат, вклучително и преку глобални напори, како што е Иницијативата за бејби-френдли болница и насоки за советување за доење.
- Обезбедување на работодавачите да им овозможат на жените време и простор што им се потребни за доење; вклучувајќи платено родителско отсуство со подолго породилно отсуство; безбедни места за доење на работното место; пристап до достапна и квалитетна нега за деца; и универзални бенефиции за деца и соодветни плати.
Додека се приближуваме до Самитот на ОН за системи за храна во септември и Самитот за исхрана за раст во Токио во декември, владите, донаторите, граѓанското општество и приватниот сектор имаат можност да направат паметни инвестиции и обврски за справување со глобалната криза со неисхранетост – вклучувајќи заштита, промовирање и поддршка на доењето – преку посилни политики, програми и акции.
Сега не е време да ги намалиме амбициите. Сега е време да се стремиме високо. Ние сме посветени да направиме успех со Година на акција за исхрана за раст (Nutrition for Growth Year of Action) – преку обезбедување дека правото на секое дете на хранлива, безбедна и достапна храна и соодветна исхрана се остварува од почетокот на животот, почнувајќи од доењето, се вели во заедничката изјава.
