Родителите може да се сомневаат дека нивното дете е аутистично, но можеби не се сигурни на што точно да внимаваат. Според терапевтот Конор Мекдонах, постојат пет знаци кои можат да откријат дали детето е аутистично.
Тој на социјалните мрежи објави видео во кое, според сопственото искуство, ги наведува најочигледните знаци на аутизам кај малите деца на возраст од 12 до 36 месеци.
„Треба да се напомене дека ние обично не ги проценуваме децата додека не наполнат четири години, така што моето гледиште доаѓа од родителите кои ги пријавиле знаците што ги воочиле кога нивните деца биле на таа возраст“, истакнува тој.
Тој вели дека првите знаци се потешкотии во сетилната обработка. Со други зборови, децата кои силно реагираат на гласни и ненадејни звуци или на материјалот на облеката, на пример, би можело да имаат аутизам.
„Уште еден симптом може да биде постојано мафтање на рацете или постојано лулање напред-назад“, вели тој.
Како трет и најочигледен знак, Мекдонах го издвојува доцнењето во говорот.
„Очекуваме детето да почне да користи први зборови на околу осум месеци, додека треба да ги спои на 24 месеци“, тврди терапевтот.
Ако детето не покажува голем интерес за други деца, тоа исто така може да биде знак дека е аутистично.
„На пример, ако детето не сака да си игра со други деца и повеќе би сакало да си игра само, тоа може да сигнализира аутизам. И на крајот, потешкотиите во комуникацијата може да укажат на тоа дека детето е аутистично. Ова се однесува на честа употреба на гестови како што е кимање со главата или тресење со главата наместо зборување“, заклучува Мекдонах.
