Клиниката „Жан Митрев“ додели 130 ваучери за педијатриски прегледи за новороденчињата од општина Центар. На овој начин Клиниката ја продолжува својата традиција на доделување ваучери за граѓаните од оваа општина кои неодамна добиле принова, водени од желбата да придонесат во безгрижниот и здрав развој на новороденчињата и да ги советува родителите за понатамошниот правилен развој.
Ваучерите за педијатриски прегледи беа доделени на настан што се одржа во Паркот на франкофонијата, а како дел од потпишаниот меморандум за соработка со општина Центар – Скопје.
Прегледите на новороденчињата ќе ги спроведува специјалист педијатар д-р Станислава Анѓелеска, а ваучерот може да се искористи во следните три месеци од доделувањето. Потребно е само родителите да закажат преглед за своето бебе на телефонскиот број 02 3091 484.
