Успивањето на детето може да биде долготраен процес кој трае бесконечно. Сигурно сте пробале различни техники што ги советуваат мајките и експертите, но на некои деца единственото што им треба е мама која лежи покрај нив.
Без оглед дали останувате со вашето дете додека заспие или не, ова е тема за која многу се зборува и дискутира помеѓу родителите и стручњаците. Некои велат дека успивањето на детето го намалува развојот на независност, а други веруваат дека тоа ќе помогне во развојот на блискост. Но, во некои слуачи родителите воопшто немаат избор.
Експертот за спиење, Рејчел Гортон објаснува како изгледало успивањето со нејзиното дете.
“Можев да се откажам од очекувањето мојот син да треба независно да спие или можев да се чувствувам фрустрирано оти мојот син не реагира на начин на кој јас сакам“, вели Гортон.
Според Центарот за нарушувања во спиењето при УКЛА, еден од три вообичаени проблеми кај малите деца е потребата за друго лице при успивање и спиење. Тоа значи родителот да лежи покрај детето или да го вози во автомобил. Детето така учи да заспива со друго лице кое станува “перница“, а потоа детето често не може да заспие ако ја нема “перницата“ покрај себе. Ова се нарекува “асоцијација за почеток на спиење“. Вашето дете сака мама да е покрај него бидејќи ве сака, но може да биде и преплашено или загрижено. Некои стручњаци сметаат дека е важно децата да се учат да спијат самостојно и дека тоа е витално за нивниот развој. Постои загриженост дека детето ќе стане зависно и нема да може само да функционира.
Но, ова не мора да е точно. Истражувањата покажуваат дека приврзаноста кон детето не е штетна за него. Според истражување објавено во списанието Korean Journal of Pediatrics, чувствителните родители му помагаат на детето да стане посамоуверено, независно, постабилно и безбедно. Авторите на истражувањето им порачуваат на родителите кои се одвоени од нивните деца, дека со тоа ги ограничуваат децата и нивната способност да “развијат свои потенцијали и стабилна личност“.
Ова, се разбира, не значи дека секој родител може или треба да лежи со детето додека не заспие. Но, како што вели Гортон како експерт, но и како мајка, само треба да го следите она што вашето срце ви кажува дека е најдобро за детето.
“Ова ме потсети на клучната улога што ја имам во животот на мојот син, не само за време на спиењето, туку како личност која цел живот го учи на самодоверба. Јас сум негова константа. Јас сум личноста што ја гледа кога чувствува страв. Моето дете се чувствува безбедно со мене. Значи, можам да му дадам мир за да може да се опушти, да земе длабок здив и да заспие“, вели таа.
