Хрватската Агенција за лекови и медицински производи (ХАЛМЕД) објави дека добила пријава за сомнеж на несакан ефект со смртоносен исход кај 33-годишно лице, кое починало 12 дена откако било вакцинирано со АстраЗенека.
ХАЛМЕД во моментов е во контакт со здравствената установа каде што е евидентиран овој случај, со цел да се достави целата медицинска документација што е можно поскоро, врз основа на која може да се направи проценка на причинско-последичната поврзаност, се вели во соопштението, кое го пренесуваат хрватските медиуми.
„Во пријавата е наведена тромбоцитопенија и крвавење, меѓутоа, пријавата е многу оскудна и не содржи документација за причините за смртта, како ни за текот и развојот на настаните што довеле до смртен исход. Очекуваме да ја добиеме бараната медицинска документација што е можно поскоро, вклучително и отпусно писмо, а дополнително и наодот од обдукцијата која е во тек.“
Пријавата ќе биде испратена и до Европската агенција за лекови (ЕМА), како би се вклучила во проценка на случајот.
