Вакцинирањето на бремените жени против коронавирус може да помогне во спречување на хоспитализација на новороденчињата поради КОВИД-19, особено ако идните мајки примиле вакцина подоцна во бременоста, покажало ново американско истражување.
Откритието фрла светлина врз тоа дали придобивките од вакцинацијата за време на бременоста се однесуваат на доенчиња кои би биле премногу мали за да примат вакцини.
Научниците од неколку педијатриски болници и Центарот за контрола и превенција на болести на САД (ЦДЦ) проучувале деца помлади од шест месеци помеѓу јули 2021 година и јануари 2022 година.
Студијата анализирала податоци за 379 хоспитализирани доенчиња – 176 со КОВИД-19 и 203 кои биле примени поради други проблеми.
Утврдено е дека вакцините против КОВИД-19 биле 61 процент ефикасни во спречување на хоспитализација на деца чии мајки биле вакцинирани за време на бременоста.
Таа заштита се зголемила на 80 отсто кога мајките биле вакцинирани од 21. недела од бременоста до 14 дена пред породувањето. Ефективноста на вакцинацијата падна на 32 отсто за бебињата чии мајки биле вакцинирани порано во бременоста.
Авторите на студијата предупредуваат дека проценките за ефикасноста на вакцината порано во бременоста треба да се толкуваат со претпазливост поради малиот број на примероци.
“Сакаме да се погрижиме да ги заштитиме и мајката и новороденчето“, вели Дејна Мини-Делман од ЦДЦ.
“Значи штом трудницата сака да се вакцинира, треба тоа и да го направи“.
Бремените жени се изложени на зголемен ризик од тешка форма на КОВИД-19, а инфекцијата со ковид за време на бременоста може да го зголеми ризикот од предвремено породување, мртвороденост и други можни компликации од бременоста, оценува ЦДЦ.
Центарот препорачува жените кои се бремени или дојат, или сега се обидуваат да забременат или може да забременат во иднина, редовно да се вакцинираат во согласност со важечките препораки.
Претходни студии покажале дека вакцинацијата против коронавирус за време на бременоста не била поврзана со предвремено породување или со недоволна телесна тежина на новороденчињата.
