Иако лубеницата е нискокалорична намирница – енергетската вредност на 100гр плод изнесува само 30 калории – има висока хранлива вредност бидејќи изобилува со витамини, минерали, фитонутриенти и растителни влакна. Со оглед дека сите калории потекнуваат од јаглехидратите, му дава на организмот силен енергетски поттик. Исто така, лубеницата содржи природни овошни шеќери кои телото може многу брзо да се апсорбира и да ги искористи како извор на енергија.
ХРАНЛИВА ЗА МАМА!
Лубеницата е богата со бета-каротен, кој во процесот на метаболизмот се разложува на витамин А, како и со витамин Ц и Е. Тоа се важни антиоксиданти кои спречуваат оштетувања предизвикани од слободните радикали. Лубеницата има и поголема концентрација на ликопен – моќен антиоксидант, од кое било свежо овошје или зеленчук. Богата е и со витамини од групата Б, особено со витамин Б6, кој помага во одржувањето на имунитетот, правилното функционирање на хормоните и нервниот систем, игра значајна улога во производството на антитела,а неопходен е и за метаболизмот. Богата е и со минерали: содржи калиум, калциум, магнезиум, манган, фосфор, железо, селен, цинк и бакар. Сите овие хранливи материи се особено важни за време на бременоста, бидејќи помагаат да се одржи нормалното функционирање на телото.
ХРАНЛИВА ЗА БЕБЕТО!
Бремените жени треба што почесто да јадат лубеница, не само за да му обезбедат на организмот хранливи материи, туку со нив да го снабдат и бебето. Витамините А, Ц и Б6, како и минералите калиум и магнезиум се од витално значење за развојот на фетусот – тие го подобруваат развојот на коските, видот, мозокот, нервниот и имуниот систем и уште многу повеќе. Исто така, внесот на ликопен е важен за растот на бебето во утробата.
Кога е потребна претпазливост?
Лубеницата не предизвикува алергии, па затоа е безбедна за трудниците. Потребна е претпазливост само кај оние кои имаат бубрежно заболување (особено ако е намалено излачувањето на урина) или дијабетес. Но, иако лубеницата има висок гликемиски индекс (што означува способноста на храната да го покачи нивото на шеќер во крвта), таа содржи и до 95 отсто вода, па лекарите дозволуваат до 190 грама во еден оброк. Во секој случај, доколку имате некој од наведените здравствени проблеми, неопходно е да се консултирате со лекар.
