Иако многумина се опоравија од Ковид-19 и се вратија на нормалниот живот, новото истражување покажува дека околу половина од пациентите кои биле хоспитализирани сè уште чувствуваат барем еден симптом на болеста и после две години.
Резултатите покажале дека пациентите ја подобриле својата физичка и ментална состојба независно од тежината на болеста, но 55 отсто од испитаниците изјавиле дека чувствуваат барем еден симптом откако прележале Ковид и две години по инфекцијата
И додека нивната физичка и ментална состојба се подобрува со текот на времето, хоспитализираните пациенти со Ковид сепак се со полошо здравје и полош квалитет на живот од општата популација. Ова е особено точно за пациентите кои страдаат од долг Ковид и кои сè уште чувствуваат барем еден симптом после две години од инфекцијата – замор, отежнато дишење или потешкотии со спиењето.
Студијата, објавена во „Лансет“, опфатила 1.192 учесници во Кина заразени со вирусот САРС-КоВ-2 за време на првата фаза на пандемијата јануари – мај 2020 година. Биле следени во првите шест месеци, потоа една година, па две години.
Резултатите покажале дека пациентите ја подобриле својата физичка и ментална состојба независно од тежината на болеста, но 55 отсто од испитаниците изјавиле дека чувствуваат барем еден симптом откако прележале Ковид и две години по инфекцијата, во споредба со 68 отсто на шест месеци.
„Независно од тоа колки тешко биле погодени од болеста, Ковид пациентите доживеале долгорочни позитивни здравствени промени и повеќето се вратиле на работа во овие две години. Сепак, висок е процентот на оние кои имале симптоми, и пациентите со Ковид се генерално со полоша здравствена состојба и квалитет на живот од општата популација“, се вели во студијата.
Резултатите од истражувањето укажуваат дека е неопходно дополнително да се истражи патогенезата на долгиот Ковид и да се развие соодветен одговор.
Истражување поврзано со менталното здравје на луѓето кои страдаат од долгорочен Ковид покажува дека 13 отсто од таквите пациенти долго време чувствуваат симптоми на анксиозност, а 11 отсто од нив страдаат од депресија, пишува „Тајмс оф Индија“.
