♦♦♦♦♦♦♦
Женско бебе родено со коронавирус е „најсилниот доказ досега“ дека вирусот се пренесува во матката, велат научниците.
Мајката на новороденчето од Тексас, САД, била дијагностицирана со COVID-19 пред нејзиниот воденик да пукне во 34. ГН. Се породила предвреме, а нејзиното бебе било однесено на интензивна нега и првично изгледало здраво, но следниот ден развило треска и потешкотии во дишењето.
Бебето било тестирано позитивно за SARS-CoV-2 – на 24 и 48 часа по раѓањето. Новороденчето неколку дена било третирано со дополнителен кислород, но не му била потребна механичка вентилација. Тестовите за коронавирус продолжиле да се враќаат позитивни во текот на наредните две недели, но на 21. ден, и мајката и бебето биле испратени дома во добра состојба.
„Прв случај“
Лекарите од University of Texas Southwestern Medical Center во Далас, велат дека се првите што документирале интраутерино, или „во матката“, пренесување на коронавирус од заразена мајка на новороденче.
Нивниот извештај за случајот, предводен од д-р Џулид Сисман, беше објавен во списанието „Paediatric Infectious Disease Journal“ во петокот.
Д-р Аманда С. Еванс, еден од водечките автори на новата студија, рече: „Бројни новороденчиња сега се раѓаат од бремени жени кои се дијагностицирани со SARS-CoV-2, при што повеќето од овие новороденчиња немаат респираторни заболувања или позитивни молекуларни докази за SARS-CoV-2“.
Сега е уште поважно бремените жени да се заштитат од инфекција со COVID-19
„Нашата студија е прва којашто ја документира интраутерината трансмисија на инфекцијата за време на бременоста, заснована врз имунохистохемиски и ултраструктурни докази за SARS-CoV-2 инфекција во феталните клетки на плацентата“.
Авторите објаснуваат дека мајката на бебето, која исто така имала дијабетес тип 2, била дијагностицирана со COVID-19 додека била бремена. Таа се породила во 34 ГН, а бебето е исто така родено „големо за неговата гестациска старост“ – важна компликација на новороденчиња од мајки дијабетичари, пишуваат тие.
Истражувачите ја испитувале плацентата, која покажала знаци на воспаление на ткивата. Но, покомплицираните тестови на феталните клетки откриле присуство на коронавирусни честички и протеин специфичен за Covid-19.
Заедно, овие откритија потврдиле дека инфекцијата била пренесена во матката, а не за време на или по раѓањето, се вели во извештајот.
„Редок настан“
Д-р Сисман додава дека иако податоците за COVID-19 остануваат многу ограничени, „интраутериниот пренос на SARS-CoV-2 се чини дека е редок настан“.
Тимот, исто така, ги потенцираше итните области за понатамошно истражување, вклучувајќи ги механизмите и ризик-факторите на пренесување преку матката, како и исходите од конгениталниот COVID-19 кај новороденчињата.
„Сакавме да бидеме многу внимателни во нашето толкување на овие податоци, но сега е уште поважно бремените жени да се заштитат од COVID-19“, додаде д-р Еванс.
(The Sun)
