Земајќи ги предвид научниците и стручни сознанија за КОВИД-19 кои досега се познати, прим. д-р Весна Степаниќ, специјалист гинеколог зборува за најчестите митови и заблуди за оваа инфекција од аспект на женското здравје.
Трудниците се позагрозени од инфекција со новиот коронавирус од останатото население. НЕТОЧНО.
Бременоста е “посебна состојба“, некои процеси во организмот се поинакви кај жена која е бремена и жена која не е, нешто што надвор од бременоста може да се смета за отстапување од нормалното, во бременоста е нормално итн. Но, според се што знаеме, нема докази за поголема загрозеност на трудниците поради инфекција со КОВИД-19. Така, на бремените жени без оптоварена анамнеза им се препорачува, како и на останатото население без познати здравствени ризици, придржување на општите препораки кога се работи за превенција.
Новороденчето на трудница со докажана КОВИД-19 инфекција, ќе биде болно. НЕТОЧНО.
Трудница заразена со КОВИД-19 може вирусот да го пренесе на плодот, но според досегашните знаења, новороденчето најчесто брзо и добро се опоравува, без развој на клиничка слика на болеста.
За време на пандемијата со КОВИД-19, не се препорачува биомедицински потпомогнато оплодување. НЕТОЧНО.
Евентуалните ограничувања произлегуваат од упатствата за работа на установата, но самите постапки за БПО се дозволени и се извршуваат и за време на пандемијата со новиот коронавирус.
Породувањето на трудница со КОВИД-19 мора да биде со царски рез. НЕТОЧНО.
Во сите родилишта се применуваат превентивни мерки на заштита од коронавирус, а начинот на породување го диктираат акушерските индикации. Така што, трудница заразена со коронавирус може да роди и вагинално и со царски рез, според проценката на гинекологот.
