Бебето нема да ви даде до знаење дека е гладно или вознемирено само со плачење. Постојат многу суптилни знаци кои родителите можат да ги препознаат. Бебињата многу често ги користат рацете за да ги покажат своите чувства, па истражувањата покажуваат дека тие кои се гладни цврсто ги стегаат тупаниците.
“Кога ќе почнете да ги храните, тие полека ќе ги ослободат прстите и целосно ќе ги пуштат кога се сити. Кога прстите се целосно испружени, тоа е знак дека детето доволно изело”, открива бабизата Кејт Вејд од Мелбурн, која работи како едукатор во Фондацијата Tiny Hearts. Таа додава дека начинот на кој бебето се огласува кажува многу за тоа.
Ако одеднаш се вознемири во сон или почне силно да мавта со рацете и нозете и гласно да гука, исто така сака да порача: „Гладно сум“. Тоа ќе го покаже и додека безбедно лежи во прегратките на мајка си. Ако ја врти главата од едната на другата страна, притоа ја отвора устата, тоа значи дека е време за јадење.
Ако пак, бебето ве гледа со широко отворени очи и посегнува по вас со рацете, тоа значи дека е подготвено за игра. А веројатно е најлесно да се препознае кога е време за спиење. Бебето ќе се смири и ќе почне да зева. Но, ова не се единствените знаци: ако е уморно, бебето ќе се смири, малку ќе се намурти и ќе го сврти грбот во лак, така што неговите нозе ќе бидат во воздух.
Секако, тоа не значи дека секое бебе секогаш ќе ги покажува истите знаци, но ако малку повнимателно го набљудувате вашето малечко, на крајот ќе го научите говорот на телото кој ви кажува како се чувствува.
