Високата температура е една од најчестите причини за загриженост и страв кај родителите, без разлика на причината и времето кога се јавува. Инфекциите се главниот причинител за зголемената температура кај децата, па се смета дека студените денови се “попогоден“ период за овој проблем.
Сепак, и летото е време кога децата неретко “горат“, а со оглед дека и надвор е жешко, зголемената телесна температура (стручен назив – фебрилност) во топлите денови навистина е непријатен проблем.
- Причини
Покрај прекумерното изложување на сонце (кое може да предизвика сончаница), инфекциите убедливо се најчестата причина за зголемена температура. И микроорганизмите често доведуваат до пораст на телесната температура кај децата.
Лекарите нагласуваат дека температурата е следбеник на болестите, а не болест сама по себе, па затоа е важно навреме да се дијганостицира и излекува заболувањето, па така да се отстрани причината за фебрилноста. Сепак, додека причината не се излекува, на детето мора да му се намали температурата која секогаш е непријатна, а особено во летниот период.
Кога е топло и однадвор и одвнатре, треба да му се помогне на детето, но без паника треба да се превземат следниве едноставни мерки.
- Прв чекор – разладете го детето
Во пријатен амбиент (најдобро да биде 24-26 степени во собата), расоблечете го детето, ако е мало нека биде само во пелена, а ако е поголемо само во гаќички.
Не го покривајте детето додека има висока температура. Ладењето е најбрз и најефикасен начин за намалување на зголемената телесна температура додека се чека лекот да го даде својот ефект.
Кога се работи за многу висока темепратура, над 39,5, најдобро оружје за брзо дејство е туширање на детето со млака (никако со ладна) вода. Наместо туширање, може и со млака вода да натопите памучна пелена и потоа внимателно да се ороси детето кое седи или лежи, така да кожата биде прекриена со капки млака вода.
Потоа детето се остава голо да се исуши, без покривање. Оваа процедура може да се повторува колку што е потребно.
