70 проценти од пациентите инфицирани со омикрон немаат проблеми со дишењето

Според Светската здравствена организација (СЗО), варијантата омикрон е откриена во 57 земји

Стравувајќи од брзината со која се шири новата варијанта на коронавирус, надеж будат податоците од јужноафриканската престолнина Преторија, кои покажуваат дека 70 отсто од пациентите заразени со омикрон немаат проблеми со дишењето, но експертите стравуваат од последиците на многуте случаи кои оваа варијанта би можела да ги донесе, пишуваат светските агенции.

Во извештајот објавен од страна на Јужноафриканскиот совет за медицински истражувања се вели дека повеќето пациенти во болницата во Преторија, за кои се верува дека се инфицирани со омикрон, не биле хоспитализирани поради Ковид-19, туку поради друга медицинска причина. Од 42 пациенти, околу 70 отсто немале проблеми со дишењето

Според Светската здравствена организација (СЗО), варијантата омикрон е откриена во 57 земји, со зголемување на бројот на случаи во Јужна Африка.

Некои здравствени експерти велат дека добрата вест е што првите луѓе за кои се знае дека биле заразени со омикрон имале благи симптоми на Ковид-19, иако предупредија дека сè уште е рано да се извлечат цврсти заклучоци за најновата варијанта на коронавирус, категоризирана од Светската здравствена организација како загрижувачка.

„Дури и ако сериозноста на болеста е еднаква или потенцијално дури и поблага отколку кај делта варијантата, се очекува хоспитализациите да се зголемат доколку се заразат повеќе луѓе и дека ќе има временски интервал помеѓу зголемувањето на инциденцата на случаи на болеста и зголемувањето на инциденцата на смртност“, се вели во соопштението на СЗО објавено во средата, според Ројтерс.

„Дури и ако се работи за лесна болест, важно е да продолжиме да дејствуваме брзо за да преземеме чекори за контрола на нејзиното ширење, бидејќи дури и да имаме голем број на благи случаи, на некои од овие луѓе ќе им треба хоспитализација, интензивна нега и некои луѓе ќе умрат“, вели Марија Ван Керхове, епидемиолог во СЗО

Во извештајот, пак, објавен од страна на Јужноафриканскиот совет за медицински истражувања се вели дека повеќето пациенти во болницата во Преторија, за кои се верува дека се инфицирани со омикрон, не биле хоспитализирани поради Ковид-19, туку поради друга медицинска причина. Од 42 пациенти, околу 70 отсто немале проблеми со дишењето и немале потреба од кислород, пренесува германската новинска агенција DPA.

„Ова е слика која не е видена во претходните бранови“, се вели во извештајот. Дури и на почетокот на претходните бранови, повеќето хоспитализирани пациенти со Ковид имаа проблеми со дишењето. Сепак, потребно е повеќе време за целосно да се одговори на прашањата за сериозноста на Ковид-19 предизвикана од новата варијанта омикрон.

Главниот епидемиолог во Калифорнија, д-р Ерика Пан е охрабрена од оваа прелиминарна проценка.

„Многу е рано, а популацијата на пациенти е млада, но охрабрувачките рани податоци укажуваат на помали потреби за кислород за пациентите и помала сериозност на симптомите“, напиша Пан на Твитер.

Д-р Ентони Фаучи, главен медицински советник на претседателот Џо Бајден за пандемијата, го нарече извештајот за Јужна Африка „охрабрувачки“ во интервју за CNN, но додаде дека „навистина треба да бидеме внимателни пред да донесеме какви било заклучоци дека болеста е помалку сериозна, или дека навистина не предизвикува тешка болест во споредба со делта“.

Новата варијанта е „очигледно многу заразна“, најверојатно повеќе од делта, моментално доминантна глобално, изјави Фаучи за АФП.

Но, тој истакна дека популацијата заразена со омикрон е млада, така што е помала веројатноста да бидат хоспитализирани. Понекогаш се потребни недели за да се развие сериозна болест, додава Фаучи.

Марија Ван Керхове, епидемиолог во Светската здравствена организација, се согласи дека е премногу рано да се каже дали омикрон ќе резултира со поблаги симптоми на Ковид-19.

„Дури и ако се работи за лесна болест, важно е да продолжиме да дејствуваме брзо за да преземеме чекори за контрола на нејзиното ширење, бидејќи дури и да имаме голем број на благи случаи, на некои од овие луѓе ќе им треба хоспитализација, интензивна нега и некои луѓе ќе умрат“, изјави таа за CBS.

„Повеќе случаи би можеле да значат повеќе хоспитализации, повеќе хоспитализации би можеле да значат повеќе смртни случаи и не сакаме да видиме тоа да се случи покрај веќе тешката ситуација со делта, која кружи низ цел свет“.

Едно од најголемите прашања за американските експерти е што ќе се случи кога омикрон ќе и се „спротивстави“ на делта варијантата, која во моментов сочинува 99,9 проценти од случаите на коронавирус во САД. Не е јасно дали делта ќе остане доминантна или омикрон ќе ја истисне.

„Она што сè уште не го знаеме е колку ќе се пренесува, колку добро ќе делуваат нашите вакцини, дали ќе доведе до посериозна болест“, рече д-р Рошел Валенски, директорка на Американскиот центар за контрола и превенција на болести за ABC.