Во период кога во регионот и во Европа се зачестуваат случаите на голема кашлица, Македонија моментално стои на околу 83,9 % покриеност со примовакциналната серија, односно со првите три дози кои се примаат во втори, четврти и шести месец по раѓање, информираше вчера претседателот на Комисијата за заразни болести д-р Александар Петличковски, по состанокот на Комисијата на кој се дискутираше за епидемиолошката состојба во однос на големата кашлица и грипот.
На почетокот, симптомите наликуваат на оние на обична настинка (кивање, течење на носот, малку покачена температура и блага кашлица)
„Тоа не е бројка која ја посакуваме и затоа ги повикуваме родителите кои ја прескокнале вакцинацијата за голема кашлица да ги надополнат овие пропуштени дози, со тоа што на тој начин обезбедуваат најдобра заштита за малите деца на возраст до 2 години. Големата кашлица е најопасна болест за малите деца и вакцинацијата е со таа цел да се намалат ризиците кај нив“, изјави д-р Петличковски.
Состојбата со големата кашлица во државава стои на два случаи. „Останати сме на тие два случаи – еден импортиран, еден локален случај. Знаете, од деновите наназад се работи за една девојка родена во 1994 година и едно шестмесечно дете. Двата случаи се невакцинирани, во добра состојба“, рече Петличковски.
Што е голема кашлица?
Големата кашлица е многу заразна бактериска болест која се јавува како резултат на инфекција со бактеријата Bordetella pertussis. Ги погодува белите дробови и дишните патишта, позната е и како пертусис, а се карактеризира со „магарешки“ звук при вдишување воздух.
„Големата кашлица е најопасна болест за малите деца и вакцинацијата е со таа цел да се намалат ризиците кај нив“,
Д-р Александар Петличковски
Симптоми
Симптомите обично се појавуваат 7 до 10 дена по инфекцијата, но може да се појават и до 21 ден подоцна.
- На почетокот, симптомите наликуваат на оние на обична настинка (кивање, течење на носот, малку покачена температура и блага кашлица).
- Во следните две недели кашлицата се засилува, а оваа фаза се карактеризира со бројни брзи налети на кашлање по кои следи гласно, пискаво вдишување. Нападите на кашлање често завршуваат со исфрлање на густа, проѕирна слуз и повраќање. На почетокот се појавуваат навечер, а подоцна зачестуваат во текот на денот и можат да траат месец до два.
- Најтешка клиничка слика имаат доенчињата кои може да престанат да дишат поради сериозно стеснување на респираторниот систем, кое може да заврши фатално. Покрај доенчињата и децата, најзагрозени се лицата над 65 години, пациенти со намален имунитет и пациенти со хронични заболувања.
Компликации
Најтешките форми на голема кашлица се јавуваат кај доенчињата. Големата кашлица може да поприми особено тешки форми кај невакцинирани доенчиња или кај доенчиња чии мајки се невакцинирани. Компликациите вклучуваат пневмонија, енцефалопатија (болест на мозокот), конвулзии, па дури и смрт.
Кај возрасните и поголемите деца, компликациите вклучуваат краткотрајна неможност за дишење, скршени ребра, ректален пролапс и хернија (кила).
Вакцинацијата е спас од враќањето на болестите кои се искоренети, а можат да го вратат светот во минатото
Пренесување
Големата кашлица се шири преку воздухот со капки кои настануваат со кашлање и кивање на заразеното лице. Големата кашлица може да ја пренесе и лице кое има само блага форма на болеста или заразено лице кое нема никакви симптоми. Често се случува постарите браќа или родители кои можеби се носители на бактеријата да ја внесат болеста во куќата и на тој начин да го заразат доенчето.
Кој е изложен на ризик од пертусис
Секој кој не е вакциниран против голема кашлица или не ги примил сите потребни дози од вакцината може да се зарази со оваа болест.
Најважниот начин за спречување на голема кашлица е целосна вакцинација. Вакцината против пертусис обично се дава во комбинација со вакцини против дифтерија и тетанус.
Третман
Антибиотиците може да се користат за лекување на голема кашлица и спречување на ширење на болеста. Меѓутоа, за да биде што е можно поефективен, третманот мора да започне во раните фази на болеста, односно во текот на првата недела или две пред да се појават бројни брзи напади на кашлање. И покрај тоа што лицето се лекува, кашлањето често продолжува да трае повеќе недели.
