ПИШУВА:
Катерина Шекеровска-Димовска
katerina@pedijatar.mk
„Два дена после сомнителниот случај почнав да имам лесно покачена температура, главоболки и малаксаност. Имајќи ги предвид симптомите, самоволно се одлучив да направам тест за актуелниот вирус“, објаснува д-р Илбер Кокале, педијатар од Дебар и еден од новозаразените со Ковид-19 во нашата земја. Д-р Кокале во кратко интервју за Педијатар.мк раскажува кога се посомневал дека може да е заразен со новиот коронавирус, каков е текот на болеста, како се чувствува во моментот и што им порачува на своите колеги во борбата против Ковид-19. Д-р Кокале, исто така, има и препораки до родителите околу мерките кои треба да ги преземат за да ги заштитат своите деца од коронавирусот.
Д-р Кокале, Вие сте омилен педијатар во Дебар, секојдневно сте во контакт со многу луѓе, родители и деца кои доаѓаат во Вашата педијатриска ординација. Кога, всушност, се посомневавте дека сте заразени со Ковид-19 и како ја примивте веста за позитивниот тест?
Д-р Кокале: Ние како здравствени работници секојдневно се соочуваме со секаква патологија и немаме претстава кој пациент со каква тежина на болеста се среќава и како такви немаме право да ги осудуваме. Два дена после сомнителниот случај почнав да имам лесно покачена температура, главоболки и малаксаност. Имајќи ги предвид симптомите, самоволно се одлучив да направам тест за актуелниот вирус. Искрено да ви кажам многу драматично ја примив веста дека сум позитивен на Ковид-19. Непријатно се чувствував не заради себе него поради одговорноста кон пациентите, семејството и потесниот круг.
Како се чувствувате во моментов, кои се симптомите кои ги имате?
Д-р Кокале: Во моментот искрено да ви кажам не чувствувам никакви тегоби (ни покачена температура, ни сува кашлица ниту малаксаност). Општата здравствената состојба е задоволителна.
На сите колеги кои се на прва борбена линија, а и останатите малку поголема одговорност кон себе и кон другите и употреба на заштитните мерки (ракавици, капа и маска)
Дали можеби Ве фаќа паника?
Д-р Кокале: Не! Како здравствени работници имаме голема одговорност и должност да ги почитуваме правилата на Светската здравствена организација (СЗО) и Министерството за здравство и да им пренесеме на пациентите дека барем во оваа фаза не треба паника и страв него мерки за предупредување.
Што би им порачале на своите колеги кои се на првата линија на фронтот?
Д-р Кокале: На сите колеги кои се на прва борбена линија, а и останатите малку поголема одговорност кон себе и кон другите и употреба на заштитните мерки (ракавици, капа и маска).
Кога зборуваме за новиот коронавирус, досега се веруваше дека децата на некој начин се поштедени, но последното истражување кое доаѓа од Кина вели дека и тие може да се соочат со сериозни компликации. Како родителите да ги заштитат своите деца од Ковид-19?
Д-р Кокале: Според последната студија направена од лекарите во Кина, докажано е дека и децата може да бидат заразени со Ковид-19, но со помал процент. Затоа на родителите на децата им препорачувам да внимаваат и да ги заштитат, прво од сомнителни пациенти, второ совети за правилна исхрана и заштитни мерки, миење на раце, хигиено-диететски режим и чист воздух и здрава средина. Да ги почитуваат правилата на Министерството за здравство. Без паника, а секогаш пазење.
