Делта варијантата (позната и како индиска варијанта) на коронавирусот е многу позаразна од мутациите што се ширеа досега – исто така е позаразна и од типот алфа (британскиот сој): според анализите на податоците на Британската здравствена служба (PHE) се проценува дека ризикот од зараза е за 60 проценти повисок, пренесува „Дојче веле“.
Ковид-19 се манифестира повеќе како настинка кај помладата популација, вели Тим Спектор од лондонскиот Кралски колеџ
Ова го зголемува ризикот за луѓето кои претходно се вакцинирани само еднаш против коронавирусот. Лабораториските тестови покажуваат дека овие вируси побрзо се размножуваат во организмот.
Она што е важно да се знае за претстојната летна сезона: сезонската активност на делта варијантата е многу поизразена отколку што првично се претпоставуваше, изјави за јавниот сервис РББ германскиот политичар, кој се занимава со здравство, Карл Лаутербах, повикувајќи се на истражување од Универзитетот во Оксфорд. Тоа значи дека ризикот од инфекција е многу помал во текот на летото.
Кои се симптомите на делта варијантата?
Делта варијантата исто така се смета за ризична бидејќи очигледно предизвикува нешто поинакви симптоми од претходно познатите варијанти на коронавирусот. Погодените луѓе се жалат на главоболка, течење на носот и воспаление на грлото.
Поголемата заразност на делта варијантата го зголемува ризикот за луѓето кои се вакцинирани само еднаш против коронавирусот
Температурата е присутна и кај оваа варијанта, но не и губење на сетилото за мирис и вкус, беше посочено во извештаите на заразените лица преку британската апликација за следење на симптомите на коронавирус.
Тоа значи дека Ковид-19 се манифестира повеќе како настинка кај помладата популација, рече Тим Спектор од лондонскиот Кралски колеџ, кој ги анализираше резултатите од студијата.
Колку брзо се шири?
Делта варијантата се шири многу брзо. Тоа се покажало во Велика Британија, каде околу 58 проценти од возрасните веќе примиле две дози вакцина потребни за целосна заштита. „Во моментов, има зголемување од околу 50 проценти секоја недела“, рече Сандра Циесек. „Тоа е, се разбира, сигнал за предупредување“, објаснува шефот на Институтот за медицинска вирусологија на Универзитетската клиника во Франкфурт на Мајна.
Седумдневната инциденца во Велика Британија, која падна под 20 на почетокот на мај, сега повторно се искачи на над 70 нови инфекции на 100.000 жители во рок од седум дена. Затоа премиерот Борис Џонсон го одложи за четири недели укинувањето на сите мерки против ширењето на коронавирусот во Англија, кое беше планирано за 21 јуни.
Колку заштитува вакцината од делта варијантата?
Според анализата на податоците од британскиот PHE, луѓето кои се целосно вакцинирани со Бионтек или АстраЗенека се многу добро заштитени од тешката форма на болеста. Ефикасноста, како што беше истакнато, е приближно висока како и кај алфа варијантата. Ризикот од хоспитализација е намален за повеќе од 90 проценти – во споредба со луѓето кои не биле вакцинирани.
Оние кои примиле само една доза на вакцина се значително помалку заштитени. Особено кај вакцината АстраЗенека, која инаку добро штити, по првата вакцинација, како што покажала анализата, ефектот на заштита бил забележително помал.
