Кај повеќе од половина од случаевите, децата на возраст до 12 години кои се заразени со новиот коронавирус, ќе ја пренесат болеста КОВИД-19 на други членови на своите семејства, покажуваат податоците што ги објави Центарот за контрола и превенција на болести на САД (CDC). Податоците покажуваат и дека тинејџерите на возраст од 12 до 17 години, ги заразиле членовите на нивните семејства во речиси 40 отсто од случаевите.
Наодите на студијата се темелат на анализата на контактите во домаќинствата со 101 “индексен случај“ во Тенеси и Висконсин помеѓу април и септември, објави CDC.
“Индексни случаи“ (лица заразени со вирусот) во студијата имале вкупно 191 домашен контакт, односно контакт со лице со кое го делат домот.
Меѓу опфатените случаи, за 102 домашни контакти, или 53% од нив, е утврдено дека се заразени со вирусот, од што, 75 отсто од нив во рок од пет дена од изложувањето, наведуваат експертите од Центарот.
“Пренесувањето меѓу членовите на домаќинствата беше вообичаен, а стапките на секундарни инфекции беа поголеми отколку што претходно беше пријавено. Со оглед дека брзата изолација на лица со КОВИД-19 може да го намали пренесувањето во семејството, лицата кои се сомневаат дека би можеле да бидат заразени, треба да се изолираат, да останат дома и по можност да користат одделна соба за спиење и толает“, известуваат истражувачите.
Четириесет проценти од членовите на семејствата со потврдена инфекција, симптомите ги пријавиле во моментот кога болеста прво била откриена со тестирање, наведува CDC.
Истражувањето за улогата на децата во ширењето на КОВИД-19 не било конечно, иако тоа прашање многумина помеѓу летото и есента ги окупираше, додека се размислуваше за повторно отворање на училиштата во екот на пандемија.
Во јунската студија, објавена во списанието Journal of the Pediatric Infectious Diseases Society, пријавени се само два случаи на пренесување на вирусот од дете на дете во домаќинства од Чикаго, кај кои лабораториски било потврдено дека има повеќе заболени со КОВИД-19. Пријавени се и само два случаи на пренос од дете на возрасно лице.
Меѓутоа, истражувања во Европа евидентираа пренос од дете на дете во училишта во Данска, Германија и во Шведска, а во секоја земја во време на ширење на пандемијата, затворањето на училиштата различно се третирало.
Четиринаесет индексни пациенти вклучени во анализата од новата студија биле деца и тинејџери на возраст до 18 години, а според податоците, од нив се заразиле 20 од 102 случаи на пренесување во семејствата.
Од индексните пациенти, пријавени се 69 проценти од нив кои ден претходно поминале повеќе од четири часа во иста просторија со еден или повеќе членови на домаќинството, а 40 проценти од нив тоа го направиле и по почетокот на болеста.
Покрај тоа, 40 проценти од индексните пациенти пријавиле дека спиеле во иста просторија со еден или повеќе членови на домаќинството пред почетокот на болеста, а 30 проценти од нив го сториле тоа и по појавувањето на симптоми.
“Овие откритија сугерираат дека пренесувањето во домаќинствата е големо, се случува брзо и може да потекнуваи од деца и возрасни. Брзото усвојување мерките за контрола на болеста, вклучувајќи самоизолација дома, соодветен само-карантин за контактите во домаќинствата и носење маска за сите членови на домаќинствата во заеднички простории, може да ја намали веројатноста за пренесување на вирусот во семејствата“, наведуваат истражувачите на Американскиот центар за контрола и превенција на болести.
