Новороденче, во просек спие околу 16 часа дневно, но кај некои бебиња сонот може да трае помеѓу 18 до 20 часа, па и повеќе. Ако бебето често е поспано, се прашувате дали спие премногу.
“Понекогаш во првиот месец од животот, бебето може често да биде поспано“, објаснува педијатарот Даниел Ганџијан. Проблемот не е тој што бебето спие, туку се работи за количината на храна која му е потребна. Важно е бебето доволно да јаде, без оглед колку спие. За бебе кое се храни со мајчино млеко тоа значи да јаде од 8 до 12 пати на ден, а за бебе кое е на млечна формула од 5 до 8 пати дневно.
БУДЕЊЕ ЗА ХРАНЕЊЕ ИЛИ НЕ?
„Ако бебето е постаро од една недела и повторно ја има својата родилна тежина со здраво темпо, во ред е да се остави да спие“, објаснува Диана Вест, советник за доење. Според Амриканското здружение на педијатри, повеќето здрави бебиња не треба да се будат за хранење.
“Ако новороденчето во првата или втората недела спие повеќе од три часа во континуитет, а вашиот педијатар не е задоволен од ритамот со кој бебето добива на тежина, може да се препорача будење на бебето поради хранење. Ова посебно важи за бебињата кои се родени предвреме или кои имаат кардиолошки проблеми“, објаснува д-р Питер Гринспан, педијатар во Општата болница во Бостон.
РОДИЛНА ТЕЖИНА
Педијатарот ќе ја измери тежината на детето на секоја контрола за да го следи напредокот на бебето. „Ако видиме дека бебето добива доволно на тежина, тоа значи дека јаде доволно и нема потреба да се буди поради хранење. Но, потребни се неколку недели по породувањето, за педијатарот да има доволно информации за растот и препораката за хранење. Дотогаш, најдобро е вашето новороденче да јаде на секои два или три часа “, објаснува Ганџијан.
