Гравот е одличен извор на јаглехидрати, протеини и влакна. Изобилува со важни хранливи материи, вклучувајќи железо, калциум, Б витамини и влакна кои го помагаат растот на телото кај бебето.
Грав не му давајте на детето пред 10. месец, а и тогаш давајте му само мала количина во комбинација со друг зеленчук.
Исто така, не треба да давате заедно грав и месо, два вида на протеини кои поинаку се варат и го оптоваруваат бебешкото стомаче и го отежнуваат варењето. Гравот не се воведува како и останатите намирници – три дена по ред, оти е тежок за стомакот. Може да му го понудите на бебето еднаш неделно, а кога ќе му го дадете, проверете дали има знаци на алергија.
Како се чува гравот?
Гравот може да се чува и користи над една година, а да не ја изгуби хранливата вредност. Најдобро е да се чува во затворен сад или вреќички, на суво место, и може и на собна температура. Со стоење, зрната грав ја губат само влагата, па стариот грав е посув, но не е полош од новиот.
Сварен, гравот може да се чува во замрзнувач, и го задржува одличниот вкус и во наредните шест месеци. Во фрижидер, може да се чува и до пет дена.
