Зголемената температура е еден од најчестите симптоми на разни болести кај децата. Родителите обично ја доживуваат температурата како драматичен настан кој што укажува на сериозна болест на детето. Покрај ова, постои честа заблуда дека ако детето нема температура, не е болно.
Најчеста причина за појава на температура се различните видови на бактериски и вирусни инфекции кај децата, кои се почести во зимскиот период. Ако забележите дека вашето дете има температура, не ги повторувајте најчестите грешки што ги прават повеќето родители.
- Не инсистирајте на мирување, умерена активност на детето е дозволена. Дете кое е навистина болно ќе има потреба и да се одмори – во кревет или надвор од него.
- Не го покривајте детето и не го облекувајте премногу дебело
- Не покривајте го детето со влажна крпа
- Високата температура ја зголемува потрошувачката на калории, па на болното дете му требаат повеќе калории, а не помалку
- Не му давајте лекови без претходна консултација со педијатарот
Како да ја намалите температурата и кога да отидете на лекар?
Иако го вознемирува секој родител, а кај некои предизвикува и страв наречен “температурофобија“, високата температура сама по себе не значи ништо и всушност е знак дека нешто се случува, односно болест, објаснува педијатарот д-р Миливој Јованчевиќ.
“Некои вообичаени препораки кои се провлекуваат со години и до кои ние педијатрите се држевме во секојдневната пракса – дека над одредена температура треба да се даваат лекови за намалување – денес веќе не важат. Според современите гледишта, единственото мерило за намалување на температурата е општата состојба на детето. Тоа значи дека ако детето има, на пример, температура од 37,3 и изгледа уморно и малаксано, треба да му се даде лек за намалување, додека на дете кое има 39 степени и трча по дома, лек не му е потребен“, вели д-р Јованчевиќ.
Педијатарот ја објаснува и постапката за намалување на температурата, а првиот чекор е расоблекување на детето.
“Не е добро да ги затоплувате малите деца, бидејќи на тој начин им ја кревате температурата. Ако детето е малаксано и уморно, можете да му дадете лек – Парацетамол или Ибупрофен, но строго да се почитуваат пропишаните дози. Потоа на детето треба да му се понуди течност и тоа на собна температура за детето да се олади и одвнатре“, советува педијатарот.
По земањето на лекот треба да се почека 15 до 20 минути и доколку температурата е се уште висока, детето треба да се стави во када. Водата мора да биде за степен или два пониска од измерената телесна температура. Педијатарот напоменува дека е многу важно да се почека со ставањето во када бидејќи тој период по земањето на лекот служи за да лекот го закочи центарот за тремор или тресење.
Многу родители се прашуваат дали треба веднаш да се обратат на лекар кога ќе им се покачи температурата на детето, а д-р Јованчевиќ советува дека тоа треба да се направи во рок од 24 часа доколку се работи за доенчиња помали од шест месеци. Исто така, температура од 39 Целзиусови степени и повеќе со треска и морници може да биде знак за посериозни инфекции, особено ако детето повраќа или има осип, па затоа е неопходно детето да го прегледа неговиот лекар. Но, ако општата состојба е добра, дете постаро од шест месеци може да се лекува дома.
“Кај постарите деца може да се почека два, три дена бидејќи е можно да покачената температура спонтано исчезне“, вели д-р Јованчевиќ.
