Инфекциите на мајката, особено инфекциите на гениталиите и уринарниот тракт, за време на бременоста се поврзани со зголемен ризик од детска леукемија кај потомството, укажуваат резултатите од нова студија.
Треба да се истакне дека споменатата поврзаност не е воочена кај инфекции на респираторниот систем, дигестивниот систем или други инфекции. Исто така, не е забележана поврзаност на инфекција кај мајката со тумори на мозокот, лимфом или други видови на карциноми во детството.
Имајќи предвид дека малку се знае за етиологијата на леукемијата во детската возраст, овие резултати укажуваат на важна насока за истражување на етиологијата на детската леукемија, како и развој на потенцијални превентивни мерки.
Инаку, инфекциите кај мајката се чести за време на бременоста и се важна можна причина за генетски и имунолошки абнормалности на фетусот.Леукемијата е најчест рак кај децата. Етиологијата на оваа малигна неоплазма е слабо позната. Леукемијата во детството може да се развие во матката, имајќи предвид дека хромозомските лезии поврзани со леукемија се забележани веќе при раѓањето. Претходните студии информираа дека нивоата на цитокини при раѓање биле различни за здрави деца во споредба со поединците кои развиле леукемија во детството. Овие резултати сугерираат дека факторите поврзани со имуниот систем за време на бременоста може да бидат вклучени во развојот на детската леукемија.
Извор: JAMA Network Open
