„Нормално е да бидеме преоптоварени со сѐ што во моментов слушаме за коронавирусот Covid-19. Разбирливо е и децата да се чувствуваат вознемирено. Децата, па дури и најмалите, чувствуваат дека се случува нешто необично. Токму затоа, родителите и старателите, кои и самите се вознемирени, треба со децата да имаат повеќе трпение од обично“, вели Патриција ди Џовани, претставничка на УНИЦЕФ во земјава во интервју за Педијатар.мк.
♦♦♦♦♦♦♦
Како Вие лично се справувате со ситуацијата која ни ја наметна КОВИД-19?
Ди Џовани: Задржувањето добра емотивна состојба е многу важно за сите. Работам со тимот на УНИЦЕФ и даваме сѐ од себе за да ја обезбедиме потребната помош за земјата, истовремено водејќи сметка за себе, а и обидувајќи се да останеме позитивни. Одржувам контакт со колегите и луѓето што ми се битни. Прифаќајќи дека во ситуации како оваа функционираме под стрес, мојата стратегија е да дадам приоритет на благосостојбата на мојот тим, што исто така налага да се однесувам добро кон себе.
Во оваа драматична ситуација за сите нас, што е најважно за децата?
Ди Џовани: Кога децата остануваат дома, пресудно е најпрво да се обезбеди чувство на нормалност. Ова значи што повеќе придржување до редовната дневна рутина и распоред, особено пред да си легнат, а и создавање можности да учат, да играат и да се релаксираат во безбедна средина.
Важно е децата да се научат како да се заштитат себеси и другите од ширење на коронавирусот. Еден од најевтините, најлесните и најважните начини да се спречи ширењето е да го научиме детето често да си ги мие рацете со сапун и вода.
Децата може да не прават разлика меѓу сликите на екранот и сопствената реалност, па може да поверуваат дека се наоѓаат во непосредна опасност. Родителите може да им помогнат на децата да се справат со стресот така што ќе разговараат со нив, објаснувајќи зошто е важно да останат дома и дека на овој начин се штитат себеси и другите
Децата и посебно адолесцентите, може да се заштитат себеси и другите преку социјално дистанцирање: т.е. да избегнуваат ракување, гушкање или бакнување, делење храна, прибор, чаши и крпи со други, како и да избегнуваат близок контакт со кој било што има настинка или симптоми слични на грип.
Кои се Вашите препораки за родителите и децата?
Ди Џовани: Родителите може да им пружат сигурност на децата. Сведоци сме на многу вознемирувачки слики на телевизија или на интернет. Децата може да не прават разлика меѓу сликите на екранот и сопствената реалност, па може да поверуваат дека се наоѓаат во непосредна опасност. Родителите може да им помогнат на децата да се справат со стресот така што ќе разговараат со нив, објаснувајќи зошто е важно да останат дома и дека на овој начин се штитат себеси и другите. Повеќе совети за тоа како да разговараат со децата има на овој ЛИНК.
Доделувањето помали задачи во домаќинството, како на пример, полевање на цвеќињата или раскревање на играчките и облеката, може да им помогне на децата да се чувствуваат корисни и подобро да се справат со новата ситуација
Нормално е да бидеме преоптоварени со сѐ што во моментов слушаме за коронавирусот КОВИД-19. Разбирливо е и децата да се чувствуваат вознемирено. Децата, па дури и најмалите, чувствуваат дека се случува нешто необично. Токму затоа, родителите и старателите, кои и самите се вознемирени, треба со децата да имаат повеќе трпение од обично. Доделувањето помали задачи во домаќинството, како на пример, полевање на цвеќињата или раскревање на играчките и облеката, може да им помогне на децата да се чувствуваат корисни и подобро да се справат со новата ситуација.
Родителите може да им помогнат на децата сами да си ги мијат рацете, така што ќе им постават столче за полесно да стигнат до чешмата и сапунот. Може тоа да им го направат забавно пеејќи ги заедно со нив омилените песнички и помагајќи им да си ги истријат рацете.
Активностите на учење преку игра им помагаат на децата да продолжат да учат дома. Исто така, постојат материјали кои се достапни онлајн и се адаптирани од активности што просветните работници од целата земја ги подготвија за националната образовна веб-платформа. Таа во моментов се развива како дел од иницијативата на #Inno4Edu „Создавање средина за квалитетна настава и учење преку заедничка креација и иновации“.
Исто така, УНИЦЕФ споделува многу бесплатни дигитални материјали за да им помогне на децата да продолжат да учат и дома. Ги поттикнуваме родителите и старателите да ги искористат разните онлајн-ресурси за да стимулираат учење преку игра. (К.Ш.Д.)
