Коронавирусот се шири преку воздухот, особено во затворен простор. Научниците дојдоа до сознанија дека вирусот се пренесува преку аеросоли, ситни заразни честички кои инфицираното лице ги издишува и остануваат да лебдат во воздухот.
Шпанскиот весник „EL PAIS“ објавува интересни податоци засновани на специфичен научен модел. Така, на пример, објаснува случај кога шест лица се собрани во приватна куќа, од кои едно лице е заразено со SARS-CoV-2. Приближно 31 процент од случаите на коронавирус регистрирани во Шпанија се предизвикани од такви собири, претежно помеѓу семејството и пријателите.
Без оглед на тоа дали се придржуваат до социјалната дистанца, доколку шесте лица поминат четири часа заедно во разговор, без да носат маска за лице во просторија која нема систем за вентилација, петмина од нив ќе се заразат, според научниот модел1.
Ако лицата носат заштитни маски за лице, четворица од нив се изложени на ризик од инфекција. Маските сами по себе нема да спречат инфекција доколку се продолжи времето на изложување, пишува „EL PAIS“.
Ризикот од инфекција паѓа под едно лице кога групата користи заштитни маски за лице, го намалува времето на дружење за половина и го проветрува просторот во кој престојува.
Во моментов, научниците препознаваат три вида на пренесување на коронавирус.
Луѓето можат да се заразат преку респираторни капки од говор или кашлање, кои може да завршат во очите, устата или носот на луѓето во близина.
Вториот начин е со допирање на контаминираната површина, а третиот со пренесување на аеросоли, односно со вдишување на невидливи заразни честички што ги издишува заразеното лице.
Без вентилација, аеросолите остануваат суспендирани во воздухот и со текот на времето стануваат се погусти.
1. За да се пресмета веројатноста за пренесување на вирусот помеѓу луѓето во „ризични ситуации“ е користен „Проценувачот за пренос на COVID преку воздухот“, развиен од група научници предводени од професорот Хозе Луис Хименез од Универзитетот во Колорадо
