По бурната и непредвидлива година, конечно пристигна вакцината против коронавирус, а вакцинацијата низ цела ЕУ треба да започне кон крајот на декември.
Дури и кога ќе ја примите вакцината, потребно е време за вашето тело да изгради имунолошки одговор што ќе ве заштити, па затоа лекарите ги повикуваат луѓето да се придржуваат кон превентивните мерки дури и по вакцинацијата.
Повеќето вакцини против коронавирус се даваат во две дози – обично со разлика од три до четири недели – за да се зголемат нивоата на антитела и да се зголеми вашата заштита. Целата оваа постапка обично трае околу 28 дена и завршува набрзо откако ќе ја добиете втората доза.
Од клучно значење е доволно луѓе да се вакцинираат против COVID-19 како би биле имуни на вирусот. Но, сè додека не се постигне сето ова, потребно е и понатаму да се придржуваме кон пропишаните епидемиолошки мерки
Значи, би требало да бидете целосно заштитени од COVID-19 во рок од отприлика еден месец.
„Штом ќе ја примите вакцината, обично постои временско растојание помеѓу примањето на вакцината и заштитата од вирусот. Тоа е време кое му е потребно на вашиот имунолошки систем да одговори на новиот антиген и да развие меморија“, вели Онјема Огбуагу, лекар за заразни болести на Yale Medicine.
Се смета дека вакцините на „Модерна“ и „Фајзер“ се ефикасни 95 %. Тоа е импресивно и многу поефикасно отколку што предвидуваа експертите, но исто така значи дека 5% од луѓето кои ги примаат овие вакцини нема да бидат имуни на COVID-19.
„Тоа значи дека стотина илјади луѓе кои ќе се вакцинираат би можеле да бидат незаштитени“, рече Огбуагу.
Понатаму, ако прескокнете една доза од вакцината, нема да бидете целосно заштитени и може да се заразите. Покрај тоа, различни фактори влијаат на тоа колку брзо имунолошкиот систем на една личност реагира на вакцината.
Ото Јанг, професор по медицина на одделот за инфективни болести и микробиологија, имунологија и молекуларна генетика на David Geffen School of Medicine – UCLA, истакнува дека возраста е еден од тие фактори. Здравствените состојби кои го загрозуваат имунолошкиот систем, како што е ХИВ, исто така можат да влијаат на тоа колку брзо и ефикасно организмот на една личност ќе изгради имунитет по вакцинацијата.
Јанг потенцира дека е од клучно значење доволно луѓе да се вакцинираат против COVID-19 како би биле имуни на вирусот. Но, сè додека не се постигне сето ова, потребно е и понатаму да се придржуваме кон пропишаните епидемиолошки мерки. (Хафингтон пост)
