Научниците од Универзитетот во Јужна Калифорнија го идентификуваа најчестиот редослед на вообичаените симптоми на инфекција со коронавирус.
Како што пишува стручниот магазин „Frontiers in Public Health“, кај најголем дел од случаите првиот симптом е покачена температура. Потоа обично следуваат кашлица и болки во мускулите, па гадење, повраќање и дијареја
Редоследот на симптомите е утврден на примерок од околу 55.000 луѓе заразени со коронавирус, а истражувачите се надеваат дека нивните наоди ќе го олеснат пораното идентификување на лицата заболени од коронавирус.
„Овој редослед е особено важен да се знае кога имаме циклуси на преклопување на болести како што е грипот кои се совпаѓаат со инфекциите на COVID-19“, објасни коавторот на студијата Питер Кун, професор по медицина и биомедицински инженеринг на Универзитетот во Јужна Калифорнија (USC) во САД. Со овие нови информации, Кун вели дека лекарите ќе можат да утврдат какви чекори да преземат за да се погрижат за пациентите и да спречат влошување на нивната состојба.
Истражувачите веруваат дека пораното идентификувањето на пациентите со коронавирус може да го намали времето на хоспитализација бидејќи сега има подобри пристапи кон третман на COVID-19 отколку во почетокот на пандемијата.
