-
Индија пријави 45.374 случаи на ретка и опасна инфекција, наречена мукормикоза, од кои повеќе од 4.300 завршиле фатално, изјави министерот за здравство Мансух Мандавија
-
Инфекцијата го зафаќа носот, очите, а понекогаш и мозокот, и обично „напаѓа“ 12-18 дена по прележувањето на Ковид-19
-
Лекарите велат дека „црната габа“ е поврзана со стероидите што се користат за лекување на Ковид, а особено на ризик се изложени дијабетичарите
И додека светот се бори со новите соеви на коронавирусот, некои земји се погодени од ново заболување за кое многумина можеби и не слушнале – „црна габа“. Станува збор за инфекција кога го зафаќа носот, очите, понекогаш и мозокот, и обично „напаѓа“ 12-18 дена по прележувањето на Ковид-19. Доколку не се лекува навреме, може лесно да предизвика трагичен исход.
Повеќе од 4.300 луѓе починаа во Индија од последици на „црна габа“ или мукормикоза, која најмногу ги погодува луѓето кои прележале коронавирус, бидејќи нивниот имунолошки систем е ослабен или пациентите имаат некои придружни состојби, особено дијабетес.
Повеќе од 4.300 луѓе починаа во Индија од последици на „црна габа“ или мукормикоза, која најмногу ги погодува луѓето кои прележале коронавирус, бидејќи нивниот имунолошки систем е ослабен или пациентите имаат некои придружни состојби, особено дијабетес
„Црната габа“ е предизвикана од мувла што се наоѓа во влажна средина како што е почвата или компостот и може да го нападне респираторниот тракт. Не е заразна и не се шири од личност до личност.
Оваа болест обично влијае врз синусите или белите дробови откако лицето ќе вдиши габични спори во воздухот, а исто така може да влијае и на кожата по исеченица или изгореници. Симптомите зависат од тоа каде расте габата во телото, но може да вклучува оток на лицето, треска, чиреви на кожата и црни лезии во устата.
Болеста „почнува да се манифестира како иритација на кожата во воздушните џебови зад нашето чело, нос, јагодичните коски и помеѓу очите и забите“, наведува индиското Министерство за здравство. Потоа се шири на очите, белите дробови, а може да се прошири и на мозокот. Ова доведува до оцрнување или промена на бојата на носот, замаглен или двоен вид, болка во градите, отежнато дишење и искашлување крв.
„Еден од начините на патување на мукормикозата е инвазија на крвните садови“, вели д-р Хемант Такер, лекар-консултант во болница во Мумбаи.
Тој додава дека оваа болест ја загрозува циркулацијата и на тој начин настанува она што се нарекува некроза или изумирање на ткивото, кое потоа станува црно. Затоа се нарекува „црна габа“.
Според експертите, болеста обично се јавува помеѓу 12. и 18. ден од прележан коронавирус.
Во најтешките случаи, инфекцијата „поминува низ крвните садови во мозокот“, потенцијално предизвикувајќи губење на видот или создавајќи „отворена дупка“ на лицето, т.е. се случува нивното око да мора да се отстрани за да се спречи ширењето на инфекцијата.
Несоодветна употреба на стероиди
Експертите веруваат дека покрај дијабетесот, и несоодветна употреба на стероиди при третманот на Ковид може да доведе до мукормикоза и други габични инфекции.
За време на пандемијата, лекарите во многу земји препишуваа „на ангро“ главно два вида кортикостероиди – дексаметазон и метилпреднизолон, а во Индија овие лекови се користеа кај скоро сите болнички пациенти.
Пред да започне пандемијата на коронавирус, најмалку 38 земји пријавиле случаи на мукормикоза. Најголем број случаи се регистрирани во Индија и Пакистан, каде 140 на милион жители секоја година се разболувале од „црната габа“, покажуваат статистичките податоци.
Експертите веруваат дека покрај дијабетесот, и несоодветна употреба на стероиди при третманот на Ковид може да доведе до мукормикоза и други габични инфекции
Д-р Дејвид Денинг од Универзитетот во Манчестер, кој е експерт за габични инфекции, вели дека бројот на луѓе заболени од мукормикоза во Индија бил поголем отколку на кое било друго место во светот, дури и пред пандемијата.
„Мукормикозата е тесно поврзана со лошо третиран дијабетес, а многу луѓе во Индија имаат дијабетес“, вели тој.
Што се однесува до пациентите кои се опоравуваат од Ковид, според неодамнешните истражувања, дури 94 проценти од оние кои имаат мукормикоза, исто така, имаат и дијабетес. Исто така, поголемиот дел од пријавените случаи, дури 70 проценти, потекнуваат од Индија.
Според податоците на Министерството за здравство, Индија досега има забележано 45.374 случаи на инфекција со оваа болест, иако се стравува дека бројот е многу поголем. Најпогодени земји се Махараштра и Гуџарат, каде од инфекцијата починале 1.785 лица.
Рагурај Хегде, очен хирург од Индија, кој лекувал десетици пациенти заразени со оваа болест, вели дека бројот на регистрирани, но и починати, е многу поголем од официјалните податоци.
„Обично смртта кај мукормикоза се јавува неколку недели или месеци по прележување на болеста. Нашите сегашни системи не се доволно добри за убаво да ги анализираат овие податоци“, рече лекарот.
Бројките, исто така, треба да се земат со резерва, бидејќи ситуацијата со инфекцијата е потешка во руралните области, а само мал број од нив стигнуваат до поголемите градови.
„Гледаме пациенти кои биле третирани агресивно за оваа болест и биле отпуштени од болници како се враќаат со повторувачка инфекција што се манифестира во пошироко ширење на болеста во окото или мозокот“, рече д-р Акшеј Наир, очен хирург со седиште во Мумбаи, за Би-Би-Си.
