Употребата на дигитална технологија и социјални медиуми може да ублажи некои од негативните ефекти на социјалното дистанцирање со одржување на социјални релации помеѓу младите и нивните врсници, покажале резултати од студија објавена во списанието The Lancet Child and Adolescent Health.
“Поради пандемијата со КОВИД-19, многу млади имаат значајно помали можности за интеракција лице во лице, и тоа на возраст на која тоа е пресудно важно за нивниот развој“, предупредува авторката на студијата, проф. Сара Блакмор од Одделот за психологија на Универзитетот Кембриџ.
“Неколку месеци се многу во животот на млада личност. Треба да се мисли на доброто на младите луѓе“, додава таа.
Д-р Ливиа Томова, предупредува дека мерките не влијаат на сите млади и деца на ист начин.
“Адолесцентите кои живеат во здрави семејства, кои имаат позитивни односи со родителите или со браќата и сестрите, може да бидат помалку погодени од оние кои немаат позитивни семејни односи, или живеат сами“, вели д-р Томова која смета дека итно треба да се пручат краткорочните и долгорочните ефекти на намалената социјална интеракција лице во лице зголемената употреба на дигиталната технологија на развојот на адолесцентите и менталното здравје.
А, токму употребата на дигиталната технологија и социјалните медиуми може да ублажат некои негативни ефекти од физичкото дистаницрање, помагајќи им на младите да одржуваат социјални релации, дури и кога не можат лично да комуницираат, тврдат авторите.
Студијата за тинејџерите утврдила дека тие на социјалните мрежи минуваат повеќе од четири часа дневно, а речиси секој втор тинејџер постојано е приклучен на мрежа. Се покажало дека сите темелни компоненти и квалитет на интеракцијата лице во лице, вклучувајќи ја меѓусебната размена на информации, социјална поддршка и стекнување социјални награди, се присутни кај младите преку интернетот.
“Доказите ни говорат дека дигиталната технологија и начин на кој се користи може да им помогне на адолесцентите во изолација“, потенцираат авторите, но само ако станува збор за активна употреба на социјалните медиуми – како размена на пораки или комуникација, а не за пасивна употреба, односно за исчитување на статуси и вести.
