Анализираните научни студии и трудови, на кои упатуваат врските, покажуваат дека вакцинираните лица се значително помалку изложени на инфекција отколку невакцинираните. Дури и ако се заразат, вакцинираните поретко развиваат тешки форми на болеста, а помали се и шансите да ја пренесат заразата на други лица во нивното опкружување отколку невакцинираните.
Една холандска студија покажува дека кај 63 отсто од случаевите ќе се спречи пренесување на вирусот од вакцинирано заболено лице на некој од семејството кој е вакциниран, а 40 проценти ако домашните се невакцинирани.
И анализирана британска студија покажала дека вакцинираните лица кои ќе се разболат, во помала мера ги заразуваат своите блиски контакти отколку невакцинираните лица. Ефикасноста во спречување на трансмисијата со тек на време опаѓа кај двете вакцини.
Интересни се и искуствата на здравствените работници во Шкотска, вакцинирани со Фајзер или АстраЗенека вакцина. Членовите на семејствата на вакцинираните здравствени работници имале за 30 проценти помала шанса да се заразат 14 и повеќе денови откако здравствениот работник примил втора доза вакцина, а 54 проценти помала шанса за инфекција по 14 и повеќе денови откако здравствениот работник примил втора доза вакцина.
Во една студија објавена во Lancet, истражувачите утврдиле дека ризикот од зараза на членовите на семејството е еднаков, независно од тоа дали индексниот случај е вакциниран или невакциниран. Максималната количина на излачување на вирусот била иста кај вакцинираните и навкцинираните, но побрзо опаѓала кај вакцинираните.
До сличен заклучок дошле и автори на друга студија, кои со споредба на периодични брисови и одредување на амплификациски циклуси кај хоспитализираните пациенти, утврдиле дека вакцинираните и невакцинираните пациенти подеднакво голема колична вирус излачуваат во пикот на заразноста, но кај вакцинираните лица количината на вирус значително побрзо се намалува отколку кај невакцинираните.
Овие, како и други студии и резултати од истражувања, како и практичните искуства во различни средини, нудат доволно докази за тоа дека вакцинирањето значајно влијае на намалувањето на трансмисија на вирусот во популацијата, како и дека, ако вакцинираното лице се разболе, има помала шанса да ја пренесе инфекцијата на своите контакти, во споредба со болно невакцинирано лице.
Оваа компаративна предност што ја имаат вакцинираните лица со тек на време опаѓа, што се надоместува со довакцинирање, односно примање трета доза.
