Над 50 проценти од лицата, кои по закрепнувањето од КОВИД-19 биле отпуштени од болница, во наредните два до три месеци чувствувале симптоми како краток здив, замор, анксиозност и чувство на депресија, покажале резултатите од мало британско истражување.
Со истражувањето, кое го спровеле научниците од британскиот Универзитет Оксфорд, било следено долгорочното влијание на КОВИД-19 на 58 пациенти хоспитализирани со дијагноза на оваа болест.
Се открило дека кај некои пациенти, по инфекцијата со новиот коронавирус се развиле абнормалности на повеќе органи и дека кај некои долготрајното воспаление на белите дробови со месеци им создавало здравствени проблеми.
“Овие сознанија ја истакнуваат потребата за понатамошни истражувања на физиолошките процеси поврзани со КОВИД-19 и развој на целосен и дополнет модел на клиничка нега за пациентите, по отпуштањето од болница“, вели д-р Бети Раман, коавтор на истражувањето.
Претходно, извештај на британскиот Национален институт за здравствени истражувања објавен минатата недела, покажа дека времетраењето на болеста по инфекцијата со коронавирус, која се нарекуба и “долг КОВИД-19“, може да вклучува широк спектар на симптоми кои влијаат на различни делови од телото и умот.
Резултатите од студијата од Универзитетот Оксфорд укажуваат на тоа дека и два до три месеци по појавата на симптомите на КОВИД-19, 64 проценти од пациентите страдале од отежнато дишење, а 55 од нив пријавиле постојано чувство на замор.
Снимките магнетна резонанца укажувале на абнормалности во белите дробови кај 60 проценти од пациентите кои се опоравиле од КОВИД-19, абнормалности на бубрезите кај 29 проценти од нив, неправилности во работата на срцето кај 26 проценти од пациентите и абнормалности на црниот дроб кај 10 проценти од пациентите.
„Откриените абнормалности се тесно поврзани со серумски маркери на воспаление“, вели Раман. „Тоа упатува на потенцијална поврзаност помеѓу хроничното воспаление и трајните оштетувања на органите меѓу преживеаните“.
