Здравјето на децата секогаш е на прво место, а главна улога во тоа игра имуниот систем, кој поминува низ неколку клучни фази кај децата.
Педијатарот д-р Екатерина Морозова открива кои се најважните периоди за развој на детскиот имунитет. Првиот важен период, вели таа, започнува веднаш по раѓањето, кога бебешкиот организам се сретнува со голем број антигени кои предизвикуваат реакции на имуниот систем.
Друг важен период е на возраст од три до шест месеци, кога се намалува нивото на антитела кои се пренесуваат од мајка на бебе преку мајчиното млеко, а имуниот систем на детето сè уште не е целосно формиран. Во овој период, вели д-р Морозова, постои висок ризик од респираторни инфекции.
„Третиот критичен период е на возраст од околу две години. На оваа возраст, имуниот систем сè уште не е целосно развиен, што ги прави децата поподложни на бактериски и вирусни инфекции“.
Четвртата клучна фаза во развојот на детскиот имун систем е од четврата до шестата година, кога концентрацијата на имуноглобулините во телото достигнува нормални вредности. Меѓутоа, во овој период децата најчесто се во групна средина – градинка или предучилишна возраст, што го зголемува ризикот од инфекции.
За да го одржите имунитетот на вашето дете на завидно ниво, докторката советува здрава исхрана, како и редовна хигиена – често миење на рацете, миење после прошетка или престој во колектив, како и испирање на носот со солен раствор.
