Секоја година 1.200 нови мајки страдаат од постпородилна психоза, покажува нова студија. Според податоците од Кралскиот колеџ на психијатри, врз основа на раѓањата во 2022 година, оваа состојба погодува помеѓу 600 и 1.200 жени годишно.
Што точно е постпородилна психоза и како можеме да воочиме дека некој страда од неа?
Постпарталната психоза е ментална болест која се јавува веднаш по породувањето.
„Тоа е ненадејна и сериозна болест на менталното здравје која се јавува во постнаталниот период, обично во рок од две недели по породувањето. Меѓутоа, постојат случаи каде што може да остане неоткриена неколку недели“, вели терапевтот Сара Оливер.
Постпарталната психоза може да се помеша со бејби блуз, но таа е многу посериозна и бара итно лекување. Симптомите може да варираат од мајка до мајка, но генерално може да се дефинираат како ненадејна тешка депресија, често придружена со зголемено расположение и манични епизоди.
„Мајката може да изгледа како да е многу расположена, да се чувствува одлично и многу возбудена. Може да зборува брзо и да има многу енергија и желба за живот, а потоа во следниот час може да се претвори во нерасположена, повлечена, изолирана и молчалива личност. Во периодот на лошо расположение, може да се појават плачливост и неутешната тага“, тврди Оливер.
Заблуди и халуцинации
Заблудите и халуцинациите се карактеристики на постпородилна психоза, а засегнатото лице може да има необични верувања за кои е малку веројатно дека се вистинити – како што е верувањето дека се случуваат натприродни работи.
„Тие можат да слушаат гласови, да гледаат привиденија и да имаат визии; да мирисаат чудни работи што ги нема. Може да се појави параноја, а мајките може да станат многу сомничави и да се плашат од луѓе на кои вообичаено им веруваат. И обратно, својата доверба може да ја поклонат на несоодветни луѓе или странци“, дополнува таа.
Недостаток на сон
Постпородилната психоза, исто така, влијае на сонот. Мајка која страда од оваа состојба може да има потешкотии да заспие, дури и кога е уморна.
Промени на личноста
Новопечената мајка со постпородилна психоза може да изгледа како сосема поинаква личност од онаа што нејзините најблиски ја познаваат и препознаваат; инхибициите може да се намалат и тие можат да прават работи што инаку никогаш не би ги направиле.
Според Оливер, мајката веројатно нема да биде свесна за тоа како се однесува и како се чувствува и можеби не препознава дека и е потребна поддршка и медицинска помош. Затоа, доколку забележите некои од горенаведените симптоми кај новите мајки, веднаш побарајте лекарска помош. Тогаш дури и најлошите симптоми можат да исчезнат во рок од две до четири недели.
