Многу родители знаат дека „присилувањето“ на децата да консумираат одредени намирници е вистинска борба. Вие трошите време и труд подготвувајќи хранливо богат оброк за целото семејство, само за децата на крајот да не сакаат ни да го пробаат тој оброк, туку попрво би јаделе нешто брзо и нездраво.
Како и кај возрасните, важно е децата да јадат здрави намирници кои позитивно влијаат на нивното целокупно здравје, а со тоа и на нивниот развој. Децата посебно мора редовно да консумираат овошје и зеленчук, тврди педијатарот д- р Ендрју Елистон. „Колку храната е поразновидна во категории и бои, толку подобро, бидејќи различните видови овошје и зеленчук содржат различни витамини и микронутриенти кои често се поврзуваат со бојата на намирницата“, објаснува тој.
Децата треба да јадат овошје или зеленчук во секој оброк
Со него се согласува и педијатарката д-р Наташа Агбаи, која ги советува родителите да додаваат овошје или зеленчук во оброците на своите деца секој ден, нагласувајќи: „Овие намирници се богати со нутриенти и влакна и нудат различни есенцијални витамини и минерали кои го поддржуваат растот и развојот на детето. Постојаното вклучување на овошје и зеленчук не само што помага во исполнувањето на дневните прехранбени потреби, туку и ги зајакнува здравите навики во исхраната уште од најрана возраст“.
Како д-р Елистон, д-р Агбаи тврди дека е важно родителите постојано да им служат различни намирници во оброците на децата, како и да се обидат да им сервираат овошје и зеленчук во различни форми: од сурово, готвено на пареа, печено или подготвено во смуди. Сето ова е важно за да им се овозможи на децата да откријат нови вкусови и текстури.
Исто така, педијатарката смета дека не е потребно на децата да им се сервираат посебни оброци во споредба со остатокот од семејството. „Подготвувањето одделни ‘детски’ оброци може да испрати порака дека преференциите на децата секогаш треба да имаат предност или дека тие „мора“ да јадат различна храна. Наместо тоа, обидете се семејните оброци да ги организирате така сите да делат исто нутритивно балансирано јадење. Секогаш вклучете нешто што знаете дека детето го сака, но не двоумете се да додадете и нешто што би можело да ги предизвика неговите преференции за вкус“, советува д-р Агбаи.
Разновидна храна богата со хранливи материи е од суштинско значење за поддршка на растот на децата. Педијатрите тврдат дека постојат три вида на храна кои се најздрави и кои треба да се најдат на детското мени во некоја форма секој ден.
Интергрални житарки
Децата често не внесуваат доволно влакна, а воведувањето повеќе интегрални житарки во нивната исхрана може да помогне да се задоволи оваа потреба.
„Влакната се чест нутриент кој им недостига на децата. Дури девет од десет деца не ја консумираат препорачаната дневна доза на влакна според Институтот за медицина“, вели д-р Агбаи и додава: „Недостатокот на влакна може да предизвика проблеми како запек. Американската академија за педијатрија препорачува децата да консумираат најмалку пет грама влакна повеќе од нивната возраст. На пример, седумгодишно дете треба да консумира околу 12 грама влакна на ден“.
Примери на намирници кои се одлични интегрални житарки се овес, киноа, булгур, кафеав ориз, просо и леќа. Едноставно заменување на обичните тестенини, тортиљи или бел леб со верзии од цели зрна може да помогне. Подготвувањето овесна каша или тост од интегрален леб за појадок е уште еден начин да ги внесете овие намирници во исхраната.
Зелен лиснат зеленчук
Д-р Елистон го наведува зелениот лиснат зеленчук како една од најбогатите намирници кои децата можат да ја јадат. Покрај тоа што е богат со влакна, зелениот лиснат зеленчук содржи и голем број хранливи материи кои го поддржуваат растот, вклучувајќи фолна киселина и железо.
Со оглед на тоа дека многу деца не сакаат да јадат зелен лиснат зеленчук, родителите можат да го „скријат“ со додавање на тестенини и слично, но педијатрите сметаат дека е многу тешко некои деца воопшто да ги поттикнат да јадат зеленчук. Во овој случај, Д-р Елистон советува да им се понуди повеќе овошје наместо зеленчук.
„Доколку детето јаде разни видови овошје, добива многу неопходни хранливи материи. Грижата за здравјето на дете кое речиси и да не јаде зеленчук, но затоа јаде различни видови овошје, е многу полесна бидејќи знаете дека внесува доволно важни хранливи материи“, објаснува тој. Сепак, тој сака да нагласи дека овошјето не е исто што и овошниот сок и ги советува родителите давањето на овошен сок да не го сметаат за еднаквовреден како јадењето овошје.
Јајца
Уште една важна намирница за растот на децата на листата на д- р Елистон се јајцата. Тие се богат извор на протеини, холин (важен за развојот на мозокот и здравјето на коските), фолна киселина (важна за мозокот и имунолошкиот систем), фосфор (го поддржува здравјето на коските) и лутеин (клуч за видот). Јајцата содржат и витамини А, Д, Е и од Б групата.
Педијатрите истакнуваат дека се свесни дека е многу тешко да се поттикнат некои деца да јадат одредини намирници, но ги советуваат родителите да не се откажуваат премногу лесно.
„Истражувањата покажуваат дека дури и возрасните треба да пробаат нова храна дваесет пати пред навистина да им се допадне, а тешко е да се убедат децата да пробаат дури и еден или два пати. На родителите им препорачувам само да продолжат да им нудат разновидна храна и да моделираат здрави прехранбени навики за нивните деца“, истакнува д-р Елистон.
Педијатарката д-р Агбаи смета дека родителите треба да им даваат пример на децата кога е во прашање исхраната. „Децата поверојатно ќе пробуваат нови намирници ако видат дека нивните родители уживаат во нив. На пример, „крадењето“ малку брокула од чинијата на вашето дете затоа што е „толку добра“ може да им покаже колку уживате во здравото јадење“, објаснува таа.
