Нормално е секој родител, колку и да мисли дека е подготвен, да почувствува доза на страв и вознемиреност кога бебето ќе дојде дома од болница. Истото важи и за мајката и за таткото.
Лекарите на најмалите – педијатрите, нудат неколку едноставни, но важни совети што ќе ви помогнат полесно да ги надминете првите денови и сите изненадувања со новороденчето.
„Реалноста е дека, иако тие знаат кое седиште за во автомобил е најбезбедно или како да ги заменат пелените, многу нови родители се сè уште неинформирани за важните здравствени проблеми во врска со нивното новороденче“, вели педијатарот Ари Браун.
- Бебето ќе стане поактивно по 48 часа
Веднаш по раѓањето, бебињата обично само спијат, или поточно, тие се многу поспани додека се уште се во болница.
„По вагиналното породување, најверојатно ќе ја напуштите болницата по 48 часа, а потоа вашето бебе ќе стане свесно дека ја напуштило матката и ќе биде многу гладно“, објаснува д-р Браун.
Тоа е претежно голем шок за новите родители кои сметале дека нивното бебе е мирно, а потоа одеднаш тоа често е будно и плаче, и секако, веќе немате помош од болницата.
- Можеби нема да го храните на секои три часа
Веројатно сте прочитале или сте слушнале дека вашето бебе ќе јаде околу осум пати во рок од 24 часа. Она што многу родители не го знаат е дека овие хранења не се распределени подеднакво денски и навечер.
“Вашето бебе може да јаде неколку пати по ред, така што нема да има потреба повторно да го храните по некое време“, објаснува д-р Браун.
Се уште е многу рано да се грижите за распоредот на хранење, но опуштете се и хранете го вашето бебе секогаш кога е гладно. “Ако доите, обидете се да го натерате вашето бебе да јаде осум пати на ден, без оглед кога тоа ќе се случи, оти на тој начин и вам ќе ви се поттикне лактацијата“, додава д-р Браун.
- Лесна жолтица
Жолтицата можеби не е најдоброто нешто кога сакате да го фотографирате новороденчето, но тоа не е голема причина за загриженост.
“Сите новородени бебиња можат да добијат жолтица во првите денови од животот. Ова се случува поради зголеменото производство на билирубин. Имено, црвените крвни клетки на бебето ‘живеат’ пократко, што значи дека повеќе се распаѓаат, ослободувајќи билирубин“, објаснува педијатарот.
Покрај тоа, бебето сè уште нема доволно корисни бактерии кои помагаат при варењето, поради што храната подолго останува во цревата, па затоа во циркулацвијата се враќа повеќе билирубин од нормалното. Но, причина за загриженост може да имате ако вашето бебе одеднаш пожолти, се роди предвреме или пожолти само на одредени делови од телото, особено на нозете и стапалата. Во тој случај, треба веднаш да контактирате со педијатар.
- Бебињата се ноќни птици
Неправедно, но вистинито. Бебињата обично спијат преку ден, чекајќи ја ноќта да се забавуваат, токму кога сте веќе мртви уморни.
“Бебињата не произведуваат мелатонин во текот на првите четири недели од животот, па затоа немаат деноноќен ритам и навечер често се будни“, објаснува д-р Браун. За среќа, со тек на време ќе се среди.
- Вашето бебе многу ќе кива и ќе ика
Кога бебето кива, тоа може да биде многу неодоливо, но може да доведе и до загриженост на родителите од алергии. Сепак, бидете сигурни дека во повеќето случаи ова е најнормална појава. Бебињата не знаат како да го избришат носот, а во него, се уште се наоѓа плодова вода што минува низ дишните патишта.
Веројатно сте почувствувале и дека вашето бебе ика уште додека било во стомакот, што ќе продолжи да го прави и кога ќе се роди. Бебињата се чувствителни, па секоја стимулација доведува до грч во дијафрагмата, што се манифестира со икање, но имајте на ум дека за бебињата, напор, односно стимулацијата, може да биде и премин од спиење кон јадење.
