Со враќањето на децата во училишните клупи и градинките, се зголемува и веројатноста за појава на сезонски болести. Доколку вашето дете или бебе помладо од две години развие симптоми на настинка, постојат низа чекори што можете да ги преземете за да му ја олесните состојбата. Сепак, лекарите предупредуваат на една работа што никако не треба да се прави.
Еден од најчестите причинители на кашлица и настинка во текот на зимата е респираторниот синцицијален вирус (РСВ), кој кај деца помлади од две години може да премине во бронхиолитис. Симптомите најчесто се благи, го достигнуваат својот врв помеѓу третиот и петтиот ден од болеста и обично можат да се лекуваат дома. Кашлицата најчесто исчезнува во рок од три недели.
Лекар од британската Национална здравствена служба (НЗС), д-р Ахмед Езат, објави пет клучни препораки за ублажување на симптомите кај децата.
- Контролирајте ја покачената телесна температура
Д-р Езат препорачува користење ибупрофен или парацетамол за намалување на температурата и непријатноста, со строго придржување до упатствата на пакувањето.
„Ако вашето дете има висока температура и се чувствува лошо, дајте му ибупрофен или парацетамол“, вели тој.
Сепак, тој апелира родителите да не се обидуваат да ја намалат температурата со полевање со ладна вода или со соблекување на целата облека, бидејќи малите деца не можат да ја регулираат телесната температура толку ефикасно како возрасните.
- Користете физиолошки капки за нос
Ако детето има затнат нос, д-р Езат препорачува употреба на физиолошки капки за нос од аптека. Тие помагаат во разредување на засушениот секрет и во олеснување на дишењето. За дополнителни совети може да се обратите кај фармацевт или лекар.
- Поттикнувајте внес на течности
Важно е детето да внесува доволно течности за да остане хидрирано, што му помага на организмот да се бори против вирусот. Соодветната хидратација ја разредува слузта и го олеснува дишењето.
„Кај бебињата обидете се со помали, но почести оброци. А на постарите деца понудете им дополнителна вода или разреден овошен сок“, советува лекарот.
- Држете го детето во исправена положба
Д-р Езат им советува на родителите нивните деца, додека се будни, да поминуваат што повеќе време во исправена положба. Тоа го олеснува дишењето, особено при затнат нос, бидејќи гравитацијата помага во истекувањето на слузта и спречува нејзино натрупување во синусите и грлото.
- Обезбедете доволно одмор
Како и кај возрасните, одморот е клучен за побрзо закрепнување. Му овозможува на имунолошкиот систем да ја насочи енергијата кон борба против вирусот, ја зачувува силата и помага во спречување компликации.
Кога да побарате лекарска помош?
Доколку мало дете или бебе има симптоми слични на настинка или покачена температура, НЗС советува да се јавите кај матичниот лекар. Доколку, пак, детето има тешкотии со дишењето, престане да дише, стане млитаво или не може да остане будно, НЗС препорачува да им верувате на своите инстинкти и веднаш да повикате итна медицинска помош.
