Ви тече носот, имате главоболка и ве мачи кашлица, а во време на пандемија не сте сигурни дали станува збор за COVID-19, грип, настинка или алергија?
♦♦♦♦♦♦♦
Епидемиологот од Универзитетот „Northwestern“ д-р Садија Кан ги истакнува главните симптоми на COVID-19, споредувајќи ја болеста со сезонски вируси и алергии, истовремено истакнувајќи ја важноста на вакцината против грип оваа година.
„Вакцинацијата против грип не само што ќе ве заштити, туку и ќе го зајакне вашиот имунолошки систем и ќе ги заштити другите од грип, како и од потешко заболување доколку истовремено имате и грип и COVID-19“, вели д-р Кан, додавајќи дека вакцинацијата е исклучително важна за лицата со ослабен имунолошки систем.
„Постојат многу симптоми на настинка, грип и COVID-19 кои се преклопуваат, вклучувајќи треска, кивање, кашлање и замор“, вели епидемиологот.
Губењето на чувството за мирис и вкус е симптом кој се јавува само кај пациентите со COVID-19, па може да помогне при разликувањето од другите болести, но не се јавува кај сите пациенти. „Sci Tech Daily“ наведува неколку симптоми според кои можете да препознаете дали станува збор за алергија, настинка, грип или COVID-19.
АЛЕРГИИ
Кан нагласува дека сезонските алергии не се заразни и не предизвикуваат треска. Покрај тоа, луѓето кои имаат алергии веројатно веќе се запознаени со симптомите, бидејќи се јавуваат секоја пролет или есен. Вообичаените симптоми вклучуваат:
- Течење или затнат нос
- Кивање
- Чешање во грлото
- Чешање на очите
- Постназална дренажа
НАСТИНКА
„Настинката е предизвикана од многу различни респираторни вируси. Некои од нив можат да бидат опасни за мали деца, како што е респираторниот синцицијален вирус и да доведат до хоспитализација, но често предизвикуваат благи симптоми кај постарите деца или возрасните кои траат околу два до три дена. За разлика од грипот и COVID-19, настинката е обично лесна болест“, објаснува Кан. Чести симптоми на настинка се:
- Течење или затнат нос
- Кивање
- Болка во грлото
- Кашлица
- Синусна конгестија
- Постназална дренажа
ГРИП
„Грипот е предизвикан од вирусот на инфлуенца, што може да предизвика лесна до тешка болест, па дури и смрт“, вели Кан. Чести симптоми на грип се:
- Висока температура
- Болка во грлото
- Кашлица
- Недостаток на здив или отежнато дишење
- Болки во мускулите или слабост
- Замор
- Гадење, повраќање или дијареја
COVID-19
COVID-19 го предизвикува новиот вирус SARS-CoV-2, а заразеното лице може да биде асимптоматски носител или може да дојде до тешка болест. Заштитните маски досега се покажаа како најефикасна заштита од инфекции. Чести симптоми на COVID-19 се:
- Висока температура
- Кашлица
- Недостаток на здив или отежнато дишење
- Болки во мускулите или слабост
- Замор
- Гадење, повраќање или дијареја
- Губење на сетилото за вкус и/или мирис
