ПИШУВА:
Прим. д-р Лидија Спасова
педијатар-неонатолог
♦♦♦♦♦♦♦
Начин на исхрана на доилките (1)
Актуелна тема којашто побудува многу дилеми кај младите мајки кои ги дојат своите деца: што да јадат, што да не јадат, што смеат, а што не смеат и како тоа ќе влијае на бебето
Тезата или предубедувањата дека ако мајките јадат целулозна храна, мешункаста, дека тоа ќе делува на детето така што ќе има повеќе гасови, грчеви во стомачето, дефинитивно е отфрлена. Тоа не е точно, а кога тргнувам во објаснување на мајките им велам дека храната којашто тие ја консумираат, без разлика дали се работи за јаболко или парче торта, истата се разложува во стомакот на мајката до најпрости соединенија и како таква влегува во циркулацијата. Значи ниедни сложени шеќери не можат да влезат во циркулацијата како целулоза, туку како најпроста гликоза. Протеините како сложени протеини не би влегле во циркулацијата на мајката и како такви да стасаат до млекото, туку ќе влезат како аминокиселини. Потеклото на аминокиселините, дали ќе биде од еден или од друг производ, е независно. Тоа е суштината, тоа е метаболизмот заради кој детето не би требало да има никаков проблем со типот на исхраната на мајката.
Специфичноста во исхраната на мајката
Исхраната треба да биде квалитетна, затоа што тоа што јаде мајката се пренесува и кај детето, меѓутоа не како цели производи. Освен што треба да е квалитетна, треба да биде и во количини во коишто мајката и порано јадела, не треба да се јаде нешто посебно повеќе количински, можеби да се внесуваат дополнителни течности, меѓутоа тоа го регулира и самиот организам на мајката бидејќи секогаш кога дои чувствува потреба да има нешто за пиење до себе.
Откако се отфрли теоријата за влијанието на храната која мајката ја консумира врз грчевите кај детето, се дојде до една друга теорија, која навистина е издржана. Станува збор за тоа дека мајката, посебно кај деца кај кои имаме алергиска конситуција треба да внимава на алергените. Прво, конституцијата детето ја добива и од родителите, ја наследува. Шансите за алергиска конституција кај детето се 50% ако мајката има алергиска конституција. И што се случува? Мајка со алергиска конституција, којашто и онака има оштетена слузница на цревата преку која лесно минуваат големите протеински молекули, тие истите му прават проблеми и на детето, кај коешто ќе се јави атописки дерматит. Така што, било анамнестички, да знаеме дека се работи за дете со алергиска конституција, да имаме податок за неговите родители, било веќе да имаме пројавени знаци на алергиски појави, атописки, тогаш се препорачува т.н. хипоалергена исхрана на мајката.
ПРОЧИТАЈТЕ И… Интервју со прим. д-р Лидија Спасова: Морбилите и порано се прележувале, со и без последици, меѓутоа замислете едно полио, со трајни последици!
Тезата или предубедувањата дека ако мајките јадат целулозна храна, мешункаста, дека тоа ќе делува на детето така што ќе има повеќе гасови, грчеви во стомачето, дефинитивно е отфрлена
Хипоалергена исхрана на мајката
Што всушност ограничува оваа исхрана? Како прво, кравјо млеко. Она што старите го форсирале, на пример, на доилките не им давале да јадат јаболка, ама ги терале да пијат млеко, тоа апсолутно е обратно. Кравјото млеко се ограничува бидејќи мајка со алергиска конституција многу лесно големите протеински молекули од кравјото млеко ги пренесува на детето практично преку доењето и тука се јавуваат тие промени на кожата кај детето.
Искраната освен што треба да е квалитетна, треба да биде и во количини во коишто мајката и порано јадела, не треба да се јаде нешто посебно повеќе количински, можеби да се внесуваат дополнителни течности. Разновидна, полна со витамини, пожелно е и суплементи, оние кои ги примале за време на бременоста
Покрај кравјото млеко, тука е и какаото, односно чоколадите кои имаат многу какао. Честопати мајките ќе ми се пофалат: Да, докторка јадам чоколадо, ама само од црното. Им велам: Тоа е најлошо, јадете, ама јадете бело чоколадо во кое нема какао! Цитрусите, јагодите, оревите, лешниците, бадемите, кикиритки, смоки, исто така, се директни алергени! Тоа е она на коешто треба да се внимава.
Оваа хипоалергена диета повеќе или помалку почнавме да ја препорачуваме кај сите мајки, меѓутоа скоро на едно предавање во Белград беше потенцирано мајките да јадат нормална храна. Доколку имаме анамнестички податоци за алергиска конституција или каде што веќе имаме појава на атопичен дерматитис, во тој случај правиме ограничувања во исхраната, па дури и најново, велат дека ни тоа нема големо влијание. Значи, ова го кажувам за да ги ослободам мајките од сите оние стеги дека не смеат да јадат ова или она, да не се ограничуват, а исхраната нека им биде разновидна, полна со витамини, пожелно е и суплементи, оние кои ги примале за време на бременоста.
(Во наредното продолжение:
Прим. д-р Лидија Спасова: Што не треба да консумираат доилките, изглед на мајчиното млеко и слободно доење)
ПОВЕЌЕ ОД ИСТИОТ АВТОР, ПРИМ. Д-Р ЛИДИЈА СПАСОВА…
