Ако имате дете во градинка, веројатно веќе знаете дека есента и зимата доаѓаат со бесконечна низа на течење на нос, кивање и кашлање. Штом едно дете оздрави, друго се разболува, а за неколку дена вирусот се шири низ целата група. Сето тоа може да биде исцрпувачко и за децата и за родителите, особено кога се чини дека настинките никогаш не престануваат.
Иако не можеме целосно да ги избегнеме сезонските вируси, можеме да им помогнеме на децата да бидат отпорни и да се справуваат полесно со нив. Клучот е во паметната превенција – секојдневни навики кои го зајакнуваат природниот одбранбен систем, но и во смирен пристап кој на децата им дава чувство на сигурност.
Зошто децата во градинка често се болни
Во раните години од животот имуниот систем сè уште се развива и секоја нова инфекција го „тренира“ организмот. Децата преку контакт со другите постепено градат отпорност на различни вируси и бактерии. Затоа малите кои штотуку почнуваат градинка често „собираат“ речиси сè што кружи – од обична настинка до кашлање што не поминува.
Тоа не е знак за слаб имунитет, туку начин на кој телото учи. Но ако инфекциите се случуваат пречесто, организмот нема доволно време за опоравок. Слузокожата на дишните патишта станува почувствителна, а секој нов вирус предизвикува посилна реакција. Кога ќе го додадеме сувиот воздух во загреаните простории и присуство на многу деца, рецепт за упорно кашлање е готов.
Како да го подготвите детето за сезоната на вируси
Превенцијата не мора да биде комплицирана. Мали, постојани навики често прават најголема разлика:
- Научете го детето да мие раце – Редовното миење раце е едноставен, но најефективен начин да се спречи ширењето на вирусите. Претворете го во игра – запејте песничка додека ги мие рацете или броите до дваесет заедно.
- Поттикнувајте игра на свеж воздух – Децата кои поминуваат време надвор имаат посилен имунитет и подобра отпорност на промени на температурата. Дури и кратка прошетка во парк може да направи разлика.
- Обезбедете му доволно сон и одмор – Уморниот организам полесно се разболува. Редовна вечерна рутина и мирен сон ја зајакнуваат имунолошката одбрана повеќе отколку што мислиме.
- Обезбедете квалитетна исхрана – Овошје, зеленчук, домашни супи и доволно течности се основа на добра отпорност. Ако детето слабо јаде, воведи мали, хранливи закуски – смути, парче банана или овесни колачи.
- Поддршка на дишните патишта со природни решенија – Кога се појавуваат првите знаци на течење на нос или суво кашлање, важно е да се делува нежно, но навремено.
