По појавата на нови варијанти на новиот коронавирус, пред се, онаа од Велика Британија, термините сој, варијанта и мутација на вирусот почнаа да се мешаат. Но, овие термини не се меѓусебно заменливи и постои разлика во кој случај се користат.
„Терминот сој е специфичен за вирусот SARS-CoV-2, но не и за COVID-19, односно болеста предизвикана од овој вирус“, објаснува Жан-Пол Соси, докторанд на Универзитетот во Торонто, за „CTVNews“.
Соси истакнува дека варијанта на вирус е правилен термин што треба да се користи при класифицирање на познат вирус кој развил „специфична група на мутации“, што предизвикува таа варијанта да се однесува поинаку од сојот на вирусот од кој потекнува.
Вирусите често мутираат, но некои вируси тоа го прават почесто од другите, вели д-р Лиза Барет, канадска специјалистка за инфективни болести. Додека генетскиот код на коронавирусите (како цела група) типично се менува со текот на времето, мутациите обично не се причина за загриженост
„Сојот на вирусот има јасни карактеристики и предизвикува точно одредена реакција на имунитетот. После тоа, постојат многу, многу варијанти кои во многу случаи ќе бидат само мали групи на мутации и поинакви типови на генетски линии на тој сој“, вели Соси.
Одреден сој на вирус се смета за варијанта кога има доволно мутации во себе кои менуваат мал дел од неговиот генетски код. Соси додава дека британската варијанта на новиот коронавирус го исполнува тој услов.
Оваа варијанта е позната како Б.1.1.7. и полесно се шири меѓу популацијата поради низа на мутации откриени во нејзиниот генетски код. Според британските експерти, оваа варијанта на коронавирус е до 70 проценти позаразна од оригиналниот сој.
Сепак, сите досега забележани варијанти на болеста COVID-19 припаѓаат на сојот на вирусот SARS-CoV-2.
„Вирусите често мутираат, но некои вируси тоа го прават почесто од другите“, вели д-р Лиза Барет, канадска специјалистка за инфективни болести. Додека генетскиот код на коронавирусите (како цела група) типично се менува со текот на времето, мутациите обично не се причина за загриженост“, додава таа.
„Не мора да ја препознаваме секоја варијанта на овој вирус, но мора да утврдиме кои се најважни, а тоа е работа за која ќе бидат потребни еден или два месеци работа“, посочува Барет.
