Повеќето родители сакаат да одгледаат среќни деца. Меѓутоа, понекогаш можеби не сме сигурни кои навики можат позитивно или негативно да влијаат на менталната благосостојба на нашите деца. Психологот Марк Траверс се надоврза на неодамнешното истражување на истражувачите Флавија Изо, Едоардо Саија, Сузана Палини, Салваторе Иоверно, Роберто Бајоко и Џесика Пистела и открива пет начини како родителите можат да воспитаат среќни деца.
1. Поттикнете искуствата на отворено
Истражувањето покажало дека децата поголемиот дел од денот го поминуваат во затворени простории и на училиште, што го прави престојот на отворено посреќен и послободен.
„Активностите на отворено, како што се поминување време во природа, одење на одмор, истражување на нови места или едноставно поминување слободно време одејќи во ресторани, кино, паркови и друго, се поврзани со повисоки нивоа на среќа кај децата“, наведува Траверс.
2. Организирајте заеднички активности
„Заедничките активности, како што се готвење, домашна работа, заедничко создавање уметност, организирање денови за активности или планирање на заедничка забава, можат да ги направат децата посреќни“, вели психологот.
3. Бидете разиграни
Децата уживаат да си играат со своите родители, тврди Траверс. „Ова може да вклучува решавање на загатки, играње друштвени игри или учество во физички игри како трчање, скијање и играње кошарка, па дури и разигран контакт како скокоткање“, предлага тој.
4. Отворено изразувајте љубов
Емоционалната и физичката приврзаност играат важна улога во зајакнувањето на врските меѓу родителите и децата и внесување радост, топлина и сигурност во животот на децата, напоменува психологот.
5. Понекогаш изненадете ги со подароци
Истражувачите откриле дека, иако не е толку важно како поминувањето време заедно, среќните моменти на децата со нивните родители се состојат и од добивање подароци како играчки, облека или домашни миленици.
„Промислените подароци можат да направат децата да се чувствуваат дека нивните потреби и желби се важни и достојни за внимание. Сепак, родителите и децата можеби сакаат да даваат и примаат љубов и поддршка на различни начини. Затоа, учењето на „јазикот на љубовта“ на детето е многу важно за здрав семеен однос“, заклучува Траверс.
