Сите ние родители сакаме своите деца да ги „опремиме“ со најдобрите можни алатки, да им ги всадиме најважните и најкорисните особини, за еден ден мирно да ги испратиме во светот. Но, родителите кои претерано бараат, кои се премногу критични и перфекционисти, понекогаш вршат преголем притисок врз своите деца – што, секако, не е добро.
Децата во такви семејства можат да се чувствуваат анксиозно и осамено, што не го посакуваме. Сепак, постојат и некои предности – ако воопшто можеме така да ги наречеме.
Имено, овие деца често бараат сопствени патишта и решенија, што може да доведе до развој на корисни особини. Перфекционизмот во кој растат може значително негативно да влијае, а децата често го усвојуваат. Сепак, тоа може да им помогне и да изградат силно чувство за посветеност и мотивација.
Еве кои позитивни особини можат да ги развијат луѓето со изразито критични родители:
- Изразена работна етика
Силната работна етика често е „нуспојава“ на премногу критични, перфекционистички родители. Ако родителите ги пофалуваат само успесите на детето, тоа ќе се труди повеќе за да постигне нешто што ќе биде признаено. Овие деца често ја изедначуваат работата со љубовта. Перфекционизмот носи високи стандарди, строг ред и големо внимание на деталите.
- Исклучителна мотивација
Децата што растат со перфекционисти секогаш мора да бидат подобри, побрзи, поуспешни. Во такви услови, наградата на крајот создава силна мотивација. Оваа особина е многу важна во професионалниот свет. Едно истражување покажало дека изразената критичност на родителите може да се претвори во двигател за развој на сопствен бизнис или проект – како начин да се пренасочи срамот што произлегува од таквото воспитување. - Висока функционалност и снаодливост
Иако не е првата асоцијација, многу критичните родители често воспитуваат високо функционални личности. Иако постои ризик и самите да станат перфекционисти, способноста да го контролираат својот фокус може да го намали тој ефект. Така стануваат поприлагодливи и поуспешни во остварување на целите.
Растењето со постојани критики не е лесно и може да остави трајни последици. Но за многумина, тоа станува и почетна точка за развој на подлабока отпорност и снаодливост. Со свесен пристап, овие сили можат да станат темел за поголема самодоверба и емпатија.
