За време на новогодишните и божиќните празници најмногу време поминуваме на семејни дружења, споделувајќи убави моменти со најблиските. Меѓутоа, во овие денови кога има многу игра, смеа, забава, гледање филмови, нови играчки, излегувања, искуства, времето за спиење на децата лесно се поместува.
Дополнително, во овој период кога децата не одат на училиште, а многумина не одат ни во градинка, времето за спиење не само што се поместува, туку во одреден момент едноставно се брише, во смисла да децата веќе немаат одредено време кога си легнуваат – една вечер во осум, друга во десет, потоа повторно во осум, па во девет…
Меѓутоа, експертите предупредуваат дека воопшто не е добро децата да немаат одредено време кога одат на спиење. Истражувањето спроведено во Велика Британија, кое ги анализирало навиките на 10.000 деца на возраст од три до седум години, покажало дека децата кои немаат одредено време за спиење имаат повеќе тешкотии во однесувањето од оние кои имаат одредена рутина пред спиење.
Оваа студија објавена во Journal of Pediatrics, исто така, покажала дека, според родителите, околу 20 отсто од тригодишните деца немаат фиксно време за спиење.
Социјален џет-лег
Тим британски научници откриле и дека децата кои немаат одредено време за спиење се помалку среќни, невнимателни кон другите и почесто се караат.
Исто така, овие високи точки поврзани со чувството на помала среќа, непромисленост и кавги, не дојдоа само од родителите, туку и од наставниците на училишните деца, кои го оценија однесувањето на овие деца како попроблематично.
Судејќи според зборовите на водечкиот автор на студијата, Ивон Кели, кај децата одењето на спиење една вечер во осум, другата во десет, предизвикува еден вид „социјален џет-лег“.
„Без ни да се качи во авионот, системот на телото на детето минува низ различни зони, а тоа влијае на деноноќниот ритам и на хормоналните системи“, вели авторот во интервју за The Conversation.
Таа, исто така, објаснува дека таа и нејзиниот тим утврдиле дека овие негативни ефекти врз однесувањето може да се коригираат. Во согласност со ова тврдење, кога овие млади учесници во студијата се префрлиле од нередовно време за спиење на редовно, забележана е значителна промена во нивното однесување.
„Тоа покажува дека никогаш не е доцна да им се помогне на децата да се вратат на вистинскиот пат и дека малите промени можат да направат голема разлика“, додава проф. Кели.
Она што е исто така важно да се спомене е дека нередовното време на спиење влијае и на физичкото здравје на децата, изложувајќи ги на поголем ризик од прекумерна телесна тежина и ниска самодоверба.
