Непријатниот здив од устата се јавува кај децата, како и кај возрасните. Ова е честа причина за загриженост кај родителите и причина за посета на педијатар и стоматолог.
Некогаш причината е комплетно незагрижувачка, но може да биде знак и за некои сериозни болести. Може да да биде знак за болести на устата, органите за варење, или општо пореметување во организмот. Важно да се открие која е причината за појавата. Ако кај детето се појави непријатен здив кој трае, потребно е детето да го прегледа педијатар и стоматолог.
- Најчеста причина за непријатен здив од устата кај децата се инфекции во крајниците, грлото, синусите и носот. Постојаното слевање на секрет од носот е последица на алергиски реакции, хронична настинка или заболување на синусите. Во состав на моменталната инфекција може да дојде до размножување на бактерии кои даваат непријатен здив од устата на детето. Кога на детето му е затнат носот од алергија, настинка или зголемен трет крајник, детето диши на уста што доведува до сушење на слузницата и изостанок на антибактериската улога на плунката. Бактериите побрзо се размножуваат, предизвикувајќи распаѓање и ослободување на непријатен мирис.
- Лошата хигиена на усната шуплина е една од честите причини за појава на непријатен мирис од устата на детето. Децата јадат повеќе благо и не сакаат да ги мијат забите,а и кога ги мијат тоа не го прават правилно и доволно долго. По некој расипан заб може да биде причина за непријатниот здив, а некогаш дури и болест на непцата, кои иако ретко, сепак може да се сретнат кај децата.
- Доколку детето не пие доволно вода, а се заминава со спорт, или има зголемена темпертура, повраќање или дијареа, состојби кога потребите за течности се поголеми од вообичаено, може да се јави дехидрација и непријатен здив.
- Цицањето палец или цуцла предизвикува зголемено создавање на плунка во која забрзано се развиваат бактерии.
- Децата до 3 години може да заглават ситен предмет во носот и ако не се забележи на време ,а е доволно мал да не прави потешкотии со дишењето, може да предизвика наталожување на бактерии.
- Габичните инфекции може да бидат причина за непријатен здив, но тие не се јавуваат самостојно, туку во состав на пад на имуниетот, системски болести или долготрајна и честа употреба на антибиотици.
- Во случај детето да прима некоја хронична терапија, таа може да биде причина за непријатен здив.
- Метаболни болести и дијабетес може да се откријат токму преку лошиот здив, како еден од присутните симптоми. За среќа сериозните болести се само во еден мал процент причини за непријатниот здив, но педијатарот на преглед ќе ја открие причината за појавата на непријатниот здив.
