Пандемијата сè уште не е завршена, секојдневно бележиме илјадници нови инфекции, а секој од нас има некој во своето опкружување или пошироко семејство кој моментално е дома во изолација или неодамна прележал Ковид-19.
Меѓутоа, забележени се и многу случаи кога едно лице има симптоми по близок контакт со заразено лице, но тестот за коронавирус е негативен. Таквата ситуација не ги радува стручњаците бидејќи е потенцијално опасна – доколку некое лице е навистина заразено, а тестот е лажно негативен, постои можност за ширење на инфекцијата. Тешко е веднаш да се утврди дали некое лице навистина избегнало инфекција со коронавирус или тестот е лажно негативен.
Еве неколку причини зошто може тоа да се случи…
Лажно негативните тестови се можни
Негативните резултати од тестот кај луѓе со симптоми во повеќето случаи се покажале како лажно негативни. И ПЦР тестот исто така може да биде лажно негативен, а најчеста причина е неправилното земање примероци.
Количината на вирусот во телото е помала
Една од причините за негативен тест може да биде и малата количина на вирус во телото по инфекцијата. Тоа не значи дека личноста не може да има симптоми, но според сите досегашни истражувања, луѓето кои имаат мала количина на вирусот во себе, веројатно и послабо и поретко го пренесуваат.
Зошто е ова загрижувачко?
Како што постојано истакнуваат експертите, лажно негативниот тест може да доведе до ширење на инфекцијата бидејќи лицето не е свесно дека е носител на коронавирусот. Ако притоа не се третира адекватно, тоа го зголемува и ризикот од развој на тешки симптоми и хоспитализација, а потоа и пренесување на вирусот.
Што да направите ако се сомневате?
Доколку сте биле во контакт со лице кое е позитивно на коронавирус или сте развиле посериозни симптоми на несвесен контакт, изолирајте се. Доколку PCR тестот се покаже негативен, разговарајте со вашиот матичен лекар и проверете се во во друга лабораторија, пишува „Тајмс оф Индија“.
