Понекогаш е тешко да се процени колку долго да се почека пред да се однесе детето на лекар. Која температура се класифицира како висока? Кои видови на болки во стомакот значат дека детето боледува од нешто посериозно од стомачен вирус?
„Родителите секогаш треба да бидат претпазливи и да побараат лекарска помош кога се загрижени“, вели педијатарот Анита Чандра-Пури за Parents.com.
Врвни педијатри споделуваат кои 12 симптоми секогаш бараат реакција од родителите и лекарска помош.
Висока температура
Температурата која е 38 Целзиусови или повисока кај бебиња помлади од 3 месеци, повисока од 38,3 Целзиусови кај бебиња на возраст од 3 до 6 месеци или над 39,4 Целзиусови кај деца на возраст од 6 месеци до 2 години се смета за висока температура.
Педијатрите нагласуваат дека освен на температурата, важно е да се обрне внимание и на расположението на детето.
„Доколку треската е предизвикана од бактериска инфекција како што е инфекција на уринарниот тракт, таа може брзо да се прошири низ телото кај доенчињата“, предупредува педијатарот Џенифер Шу.
„Обично тоа е само обичен вирус, но мораме да провериме за да бидеме сигурни“, напоменува таа.
Кај деца постари од 2 години температурата не е знак на тревога се додека детето е хидрирано и се однесува нормално. Тогаш не треба да брзате на Ургентно, но добро е да се јавите кај вашиот лекар за совет.
Долготрајна температура
Температурата која не се намалува или трае повеќе од пет дена е долготрајна. Ако на детето не му е подобра и по давањето парацетамол или ибупрофен, ова може да биде знак дека инфекцијата е премногу силна за телото да се бори, а педијатарот тогаш можеби ќе сака да изврши темелен преглед за да ја утврди причината.
Треската предизвикана од обична настинка или вирус на грип обично исчезнува во рок од пет дена. Онаа што трае подолго, дури и кога е ниска, може да биде предизвикан од инфекција како што е бактериска пневмонија, која бара третман со антибиотици.
Треска проследена со главоболка
Аларм за тревога е и треска проследена со вкочанет врат, главоболка, осип налик на модринки или осип во форма на ситни црвени точки. Веднаш повикајте го вашиот лекар бидејќи ова може да бидат знаци на менингитис за кои е потребна медицинска помош.
Осип во форма на круг
Кружниот осип кој се состои од ситни црвени точки или не исчезнува кога ќе ја притиснете кожата е исто така знак дека нешто не е во ред. Оваа состојба може да значи Лајмска болест, но и други сериозни состојби. Секоја необјаснета модринка може да биде знак за можно нарушување на крвта. Дополнително, дамкав осип, особено малку подигнат, може да биде знак за алергиска реакција. Ако детето покрај осип има отежнато дишење или е возбудено или летаргично, треба веднаш да го прегледа лекар.
Необична бенка
„Внимавајте на бенките на вашето дете, особено оние од раѓање, бидејќи тие имаат поголеми шанси да станат малигни“, вели педијатарот Ари Браун.
Родителите треба да прават месечна проверка на кожата и да обрнат внимание на новите или променливите бенки. Кажете му на вашиот лекар ако забележите бенка која е со неправилна форма, има нерамни граници, не е само една боја или е подигната. Сите овие се знаци на потенцијален рак на кожата.
Ненадејна болка во стомакот
Ако детето се жали на болка во долниот десен дел на стомакот, замолете го да скокне горе-долу. Ако тоа му е тешко, тоа може да биде знак за воспаление на слепо црево. Иако слепото црево се наоѓа на долната десна страна на абдоменот, болката предизвикана од апендицитис може да започне околу папокот и да мигрира надесно.
„Кај обичен стомачен вирус често се среќаваат треска, повраќање, абдоминална болка и дијареа. Кај воспаление на слепо црево, понекогаш прво ќе се појави дијареа, а потоа болка во стомакот, повраќање и температура“, вели д-р Браун.
Ако се сомневате на воспаление на слепо црево, јавете се кај вашиот лекар бидејќи тоа е брзо прогресивна состојба и најефикасно се лекува кога ќе се открие рано.
Главоболка со повраќање
Главоболката која се јавува рано наутро или го буди вашето дете среде ноќ или е придружена со повраќање исто така не треба да се игнорира. Ова може да бидат знаци на мигрена. Мигрените кај децата не се опасни, но главоболката може да биде знак за нешто посериозно, па затоа е неопходно да се консултирате со лекар.
Намалено мокрење
Сува уста, намалено мокрење, рамна фонтанела (кај доенчиња), сува кожа, прекумерно повраќање или дијареа се симптоми поврзани со дехидрација. Веднаш контактирајте го вашиот лекар.
Сини усни
„Проблемите со дишењето се загрижувачки кога звукот доаѓа од градите и белите дробови, наместо од носот“, вели д-р Шу. Критичните проблеми со дишењето често се предизвикани од гушење, алергиска реакција, напад на астма, пневмонија или голема кашлица.
Знаци дека треба да одите на лекар се синило или промена на бојата околу устата, отежнато дишење, грчење или свирење при дишење.
Ако се сомневате дека детето има сериозни проблеми, проверете ја брзината на дишење. Избројте го секој вдишување 30 секунди, а потоа помножете го со два. Нормалната стапка е помала од 60 за новороденчиња; помалку од 40 за бебиња под 1 година; помалку од 30 за деца од 1 до 3 години; а помалку од 24 за деца од 4 до 10 години.
Потечено лице
Отечениот јазик, усни или очи, особено кога се придружени со повраќање или чешање, сигнализираат за сериозна алергиска реакција. Симптомите може да вклучуваат оток, проблеми со дишењето и интензивен оспи и бараат итна медицинска помош.
Повраќање по паѓање
Падовите генерално не се проблем кај деца постари од 6 месеци, но доколку забележите очигледни невролошки промени како конфузија, губење на свеста, повраќање или скршеници на коските, веднаш побарајте лекарска помош.
Прекумерно крварење
Исекотина што не престанува да крвари во рок од неколку минути или е широка и длабока, укажува дека на детето му е потребна итна медицинска помош. Исто така, треба да се консултирате со лекар ако животно го касне вашето дете или ако друго дете го касне вашето дете и направи рана.
