♦♦♦♦♦♦♦
Периодот во којшто се наоѓаме, високите температури и неподносливи вруќини, неминовно бара вклучување на клима уредот, кој доколку не се употребува правилно може да го загрози вашето, но и здравјето на вашето дете. За да нема здравствени проблеми заради употребата на клима, треба да следите неколку важни правила:
Проверете ја исправноста на климата
Најдобро е редовно да ја сервисирате. Ако почувствувате необичен мирис или слушнете необичен звук кој доаѓа од моторот на клима уредот, треба да го исклучите веднаш и да ги направите потребните поправки.
На почеток на сезоната
Потребно е да се исчистат или заменат филтрите на клима уредот. Ако филтрите се валкани, на нив се размножуваат бактерии и габи, кои потоа се шират низ целиот стан.
Температурата нека биде пријатна
Правило е дека температурната разлика во однос на надворешната средина не треба да биде поголема од пет до седум степени. Ова правило е тешко да се спроведе ако е 40 степени надвор. Во тој случај, поставете го клима уредот на температура што ќе им одговара на сите.
Немојте со детето нагло да излегувате од климатизирана просторија
Голема и брза промена е шок за секој организам, па и за детето. Ако излегувањето е планирано, исклучете ја климата петнаесет минути порано. Ако се брзате, задржете се во ходникот најмалку пет минути. Истото важи и за влегување во разладена просторија.
Бидете сигурни дека климата не дува директно во детето
Наместете ја климата така што никој нема да биде изложен на директно струење на ладниот воздух.
